O Concello da Coruña vén de convocar unha nova edición das bolsas deportivas dirixidas a deportistas individuais empadroados na cidade, unha liña de axudas coa que se busca apoiar o seu rendemento e facilitar a súa participación en competicións oficiais ao longo do ano.

A convocatoria está dotada con 150.000 euros e ten como finalidade contribuír a sufragar gastos derivados da práctica deportiva, como desprazamentos, licenzas federativas ou equipamento, favorecendo así a preparación e a presenza en competicións de distinto nivel.

O concelleiro de Deportes, Manuel Vázquez, puxo en valor o compromiso municipal co deporte coruñés e destacou que "estas bolsas son unha inversión directa en talento, esforzo e valores que representan o mellor da nosa cidade".

Nos últimos anos, este programa permitiu apoiar a deportistas de referencia no panorama nacional e internacional como Julia Benedetti, Enmanuel Reyes, Paula Otero, Ignacio Mateo, David Arcay, Jacobo Garrido ou Irene Blanco, entre outras e outros representantes do deporte coruñés en múltiples disciplinas.

As axudas distribúense en catro categorías en función do ámbito competitivo -campionatos do mundo, de Europa, de España e de Galicia- con contías que oscilan entre os 800 e os 5.000 euros .

Poderán optar a estas bolsas deportistas individuais federados, de entre 12 e 40 anos, que acrediten arraigamento na cidade e unha traxectoria deportiva nos últimos anos, así como proxección de futuro.

O prazo de presentación de solicitudes será de 10 días hábiles contados a partir do día seguinte ao da publicación da convocatoria no Boletín Oficial da Provincia.

Con esta convocatoria, o Goberno de Inés Rey continúa reforzando o seu apoio ao deporte base e de alto nivel, contribuíndo a impulsar o talento local e a proxección da cidade no ámbito deportivo. 

As bases completas e toda a información sobre a convocatoria poden consultarse na páxina web municipal:  Bolsas para deportistas individuais - Ano 2026