Despois de máis de doce anos de funcionamento e crecemento continuo en persoas usuarias e usos, proponse como estratexia de cidade a renovación completa e ampliación do sistema de préstamo de bicicletas, denominado BiciCoruña, para o que se propón un sistema mixto con bicicletas con apoio ao pedaleo, comunmente coñecidas como bicicletas eléctricas, e convencionais. A finalidade da ampliación do sistema, así como a introdución da bicicleta eléctrica, é acceder a zonas da cidade máis afastadas que nestes momentos están desconectadas do sistema e fomentar así o uso da bicicleta como alternativa de transporte para a cidadanía por mor dunha mobilidade sostible.

Impulsouse, dentro da Estratexia Eidus Coruña con fondos FEDER, unha contratación para a subministración dun total de 514 bicicletas (342 mecánicas e 172 con apoio ao pedaleo) e 55 estacións, xunto cun sistema de xestión TIC mediante web e app; con esta renovación preténdese mellorar a rede ciclable existente, así como fomentar e facilitar o uso dos itinerarios propostos, coa mellora da intermodalidade bici/transporte público. As estacións destinaranse a substituír as 23 actuais que quedaron obsoletas e as 32 restantes situaranse en todos os barrios da cidade que decidiu a cidadanía nos procesos participativos dos orzamentos municipais co obxecto de dotar a cidade da Coruña dun sistema de préstamo de bicicletas moderno, seguro e en liña das principais cidades europeas e favorecer así a mobilidade peonil e ciclista e aumentar o atractivo do espazo peonil.

Accede ao gráfico do Número de usos totais do servizo de BiciCoruña

II fase

Dentro dos fondos Next Generation, incluíuse unha segunda actuación de ampliación do parque de bicicletas, co obxectivo de aprovisionamento de 165 bicicletas con apoio ao pedaleo para impulsar o uso deste xeito de transporte activo entre a cidadanía. Complementarase coa adquisición por parte do concello de 75 prazas de aparcabicis seguros de uso público. Estes elementos instalaranse en puntos de intermodalidade existentes próximos a estacións e estacionamentos disuasorios, incluíndo lugares de transbordo, tanto de autobuses urbanos, como interurbanos.

Estas medidas tratan de desenvolver unha política integral da bicicleta, facilitando os desprazamentos nela e promovendo a mobilidade ciclista, inclusiva e universal, ao tempo que se reduce a contaminación asociada ao uso de vehículos ao fomentar os modos non motorizados e diminuíndo a emisión de gases contaminantes e ruído.

O estado dos traballos desta fase pode consultarse aquí.