UTILIZA SEMPRE O CASCO

- É obrigatorio en vías interurbanas, pero recomendable utilizalo tamén en cidade. É o noso único elemento de seguridade pasiva e absorberá a enerxía do impacto na cabeza.

- Sexas profesional, cicloturista ou principiante, usa o casco SEMPRE.

CIRCULACIÓN EN GRUPO

- Está permitido circular en fila de a un ou en columna de dous en dous como máximo. En ambos os casos, o grupo funciona como un só vehículo e debe circular o máis á dereita posible da vía.

Saír en grupo debería mellorar a seguridade:

- Un grupo de ciclistas é máis visible a ollos das persoas condutoras de vehículos de motor.

- Ante calquera neglixencia do resto de persoas condutoras, sempre haberá testemuñas. Se hai avarías ou accidentes, o resto de ciclistas debería ser solidario.

- E se circulas en ringleira, e tes que dar remudas, asegúrate de que non se aproxima ningún vehículo cando inicies o adiantamento.

RESPECTO ÁS NORMAS DE CIRCULACIÓN

• A persoa ciclista e a súa bicicleta son un vehículo máis. Respecta as normas de circulación. Se o resto de vehículos ten obrigas ou prioridades, a persoa ciclista tamén debe respectalas (semáforos, STOP, ceda o paso etc.).
• Se ven que respectas as normas, é máis fácil que te respecten a ti. E non esquezas que tamén podes ser sancionado.

FAITE VER:

• O resto de vehículos cumpren coa función de "ver e ser vistos" con luces e intermitencias, e un ciclista non debe ser menos, aínda que ten que poñer máis da súa parte.
• Cando é de noite ou en condicións de baixa visibilidade (mal tempo, túneles, etc) tanto en cidade como na estrada (obrigatorio) é imprescindible o uso de material reflector, en forma de chalecos, brazaletes ou catadióptricos en pedais ou rodas para que o resto de usuarios poidan distinguirnos a unha distancia de 150 metros.
• E á hora de elixir a cor da roupa para circular en bicicleta, mellor escoller cores claras e rechamantes.

Guia para persoas usuarias da bicicleta