1. Establécese unha zona de baixas emisións denominada ZBE CENTRO na contorna delimitada no Anexo II desta Ordenanza, que comprende a Cidade Vella, Avenida da Mariña, Paseo do Parrote e determinadas rúas da Pescadería, permitíndose no devandito territorio a circulación exclusiva do transporte público, os servizos de emerxencia e os vehículos especialmente autorizados, así como o transporte que realiza carga e descarga de mercadorías en determinadas franxas horarias segundo a súa etiquetaxe ambiental.

2. O acceso e circulación de vehículos na ZBE unicamente estará permitido a:

1. Transporte público colectivo de persoas viaxeiras.
2. Taxis exclusivamente na Avenida da Mariña, Avenida Montoto ata Porta Real e Cidade Vella.
3. Vehículos autorizados.
4. Vehículos que realicen labores de carga e descarga en horario de 06:00 a 11:00 horas (para todo tipo de vehículos). Este horario ampliarase nas franxas de 05:00 a 06:00 horas e de 11:00 a 12:00 horas para vehículos con etiqueta ambiental 0 Emisións ou ECO segundo o RXV.
5. Vehículos cualificados como de Servizo público, coa limitación de 8 metros de longo para a circulación no ámbito interior da Cidade Vella.
6. Vehículos habilitados para estacionar nas reservas de espazo autorizadas. Esta regulación poderá ser modificada por Acordo adoptado pola Xunta de Goberno Local.

3. Poderán obter o distintivo de vehículos autorizados para acceder e circular aqueles que se axusten ás condicións establecidas no Decreto da Alcaldía de 27 de marzo de 2017 polo que se regulan as zonas peonís reguladas (ZPR) e o Decreto da Alcaldía do 1 de xuño de 2018 polo que se delimita o ámbito da Cidade Vella como área de preferencia peonil.

4. Non se poderá estacionar no ámbito da ZBE CENTRO excepto nos casos das excepcións indicadas para o estacionamento nos decretos citados no punto anterior.

5. A sinalización da ZBE CENTRO será a que se indica no Anexo III desta ordenanza, dispoñéndose nos límites de dicha ZBE CENTRO, cos paneis complementarios que se necesiten para unha maior claridade. Este Anexo III poderá ser modificado por Decreto de Alcaldía.

6. Os ciclos, as bicicletas e os VMP poden circular pola ZBE respectando en todo caso as normas de circulación establecidas na Ordenanza para as zonas peonís, onde só poderán circular os ciclos e bicicletas se a sinalización así o recolle explicitamente, e sempre a unha velocidade máxima de 10 Km/h.