O alcalde da Coruña, Carlos Negreira, acompañado pola concelleira de Tráfico e Mobilidade, Begoña Freire, e polo presidente da Asociación local de Autotaxis da Coruña (Tele-taxi), Manuel Sánchez Quindimil, participou esta mañá na presentación de Taxiclick, unha nova aplicación que a asociación poñerá en marcha nos próximos días na cidade e que posibilita a reserva de taxis de forma gratuíta a través de dispositivos móbiles e smarthphones.

O novo servizo, así como a descarga da aplicación, é gratuíto para o cliente e permite, entre outras utilidades, seleccionar o punto e día ou hora de partida, comprobar o estado da petición, así como o lugar onde se encontra o vehículo ou definir peculiaridades ou necesidades como un maleteiro amplo, vehículo adaptado ou pago con tarxeta.

A aplicación, que é pioneira en Galicia, e ademais de na Coruña, só se desenvolve en Madrid e Barcelona, permite a súa utilización noutras cidades españolas e europeas que contan con este sistema que inclúe a máis de 20.000 taxis. "De novo, A Coruña sitúase nos primeiros postos cando falamos de innovación e tecnoloxía", destacou Negreira que lles agradeceu aos taxistas o seu compromiso por seguir mellorando día a día, prestando un servizo moderno, eficaz, de calidade e sostible, que os consumidores sempre destacan como un dos mellores do país en canto a eficacia e calidade.

O rexedor tamén resaltou o compromiso do Goberno municipal co transporte público e lembrou que o PMUS, o primeiro Plan de Mobilidade Urbana Sostible da historia da cidade, dedica un espazo moi destacado a este apartado. "Gran parte das medidas que se están realizando, as previstas e as que se definirán no PMUS, obedecen ao noso compromiso co transporte público. Esta é unha das nosas principais preocupacións porque tamén é unha das preocupacións dos coruñeses", explicou Negreira. Neste sentido, o alcalde destacou a importancia das reunións que se están mantendo con axentes e asociacións, así como as enquisas realizadas a participación cidadá das que se están extraendo importantes conclusións.

Negreira pediulles aos coruñeses que continúen incorporando suxestións para que o plan, que estará concluído a finais de ano, conte coa maior participación posible. "Para que a cidadanía sexa a verdadeira protagonista do PMUS, nos próximos días o Concello levará aos barrios a enquisa de mobilidade, para que a pé de rúa poidan participar no que será o primeiro Plan de Mobilidade da súa cidade", concluíu.