A concelleira de Tráfico e Mobilidade, Begoña Freire, destacou que unha das prioridades que establece o primeiro Plan de Mobilidade Urbana Sostible (PMUS) é mellorar a conexión entre a cidade e a área metropolitana a través do transporte público.

"O PMUS aplica o sentido común que nos pedía a cidadanía a través das 68 medidas que desenvolvemos no documento para mellorar a mobilidade e a calidade de vida dos veciños. Todas as medidas están apoiadas pola participación cidadá levada a cabo, son realistas e viables. Entre elas está a decisión de permitir que os buses metropolitanos accedan ao centro urbano, o que achegará os residentes da contorna da Coruña ao seu destino", afirmou Freire.

A concelleira de Tráfico e Mobilidade explicou que, para resolver unha vella demanda veciñal, tamén reflectida nas enquisas do PMUS, o Concello xa mantivo reunións coa Xunta e outros axentes implicados para achegar acordos por primeira vez e así lograr que os pasaxeiros de bus interurbano poidan descender noutros puntos estratéxicos da cidade, ademais de en a Estación de Autobuses. A distribución da poboación dos concellos da comarca, con centos de núcleos rurais e entidades de poboación, aconsella este tipo de solucións; que se complementará con outras en orixe, como os aparcamentos disuasorios, tamén coordinados entre a Xunta e a área metropolitana.

Segundo recolle o PMUS, na actualidade existen 77 liñas interurbanas con parada no municipio da Coruña. Estas liñas acceden ao núcleo urbano con destino na estación de autobuses, sen dispoñer dunha boa conexión co resto da cidade, centros de traballo ou outros xeradores de desprazamentos.

"Un total de 874 autobuses da contorna metropolitana chegan a diario á estación de buses. Estamos a traballar coa Xunta e a área metropolitana para atallar contundentemente unha carencia que as anteriores corporacións da Coruña estancaron no tempo, pola súa falta de capacidade de diálogo e xestión. Agora, A Coruña tende a man liderando unha iniciativa que afecta a outros concellos, administracións e concesionarias, e o primeiro é que entre todos se planifiquen días, horas, rutas, frecuencias, información, destinos, e resto de aspectos dos buses interurbanos na cidade, para dar satisfacción e axustarse ás necesidades reais dos usuarios", engadiu a concelleira.

Para lograr este obxectivo, e así mellorar a calidade de vida de todos os residentes da Coruña e a súa comarca, o Concello aborda por primeira vez esta situación co Consorcio das Mariñas, e no marco da Comisión de Seguimento do Plan de Transporte Metropolitano da área da Coruña.

Para mellorar o intercambio modal entre o transporte público urbano e interurbano, o PMUS propón que o autobús interurbano faga parada en nodos principais da área urbana, fomentando o transbordo ao autobús urbano. A circulación do autobús interurbano deberá realizarse polo viario de maior capacidade indicado na proposta de xerarquización viaria, con corredores predeterminados, en paradas predefinidas e co compromiso de cumprimento de criterios de calidade certificados e visibilidade; todo iso co fin de satisfacer as expectativas dos usuarios.

Esta proposta tamén fomentará a utilización do autobús urbano, facilitando puntos de conectividade entre liñas urbanas e interurbanas, onde o transbordo se poida realizar con mellores condicións de accesibilidade, rapidez e comodidade, sen que os destinos queden limitados á estación de autobuses.

A concelleira de Mobilidade recalcou que esta decisión de mellorar a conexión co transporte público da comarca significará que os residentes na área metropolitana teñan maior comodidade para desprazarse á cidade en transporte interurbano e despois moverse pola Coruña a pé, en bus urbano ou en bicicleta. Na actualidade, dos 562.000 desprazamentos que se efectúan dentro do centro urbano, o 47,4% realízanse a pé e o 13,3% en bus urbano, mentres que o 37,3% dos desprazamentos internos efectúanse en coche.

Begoña Freire explicou que as análises realizadas con motivo da elaboración do PMUS evidencian que o vehículo particular é o medio de transporte prioritario para os desprazamentos entre a área metropolitana e a cidade. Das 168.000 viaxes diarias, arredor do 90% realízanse en vehículo privado, polo que todas as medidas que redunden nunha mellor conexión do bus entre a cidade e a área metropolitana supoñerán incrementar a porcentaxe de viaxeiros do transporte público e unha redución no uso do vehículo privado.

DESPRAZAMENTOS E LIÑAS

A mobilidade da Coruña coa súa área metropolitana representa case un 23% dos desprazamentos totais do municipio, que supoñen diariamente 168.000 desprazamentos, dos que o 8,9% realízanse en autobús interurbano (arredor de 5 millóns de viaxeiros ao ano).

Na Coruña e os municipios da comarca das Mariñas operan 14 empresas concesionarias de servizos de transporte regular de viaxeiros por estrada, un total de 272 liñas interurbanas das que 77 conectan A Coruña cos municipios da súa contorna metropolitana.

OUTRAS INICIATIVAS

O Plan de Mobilidade Urbana Sostible dá prioridade ao peón, ao ciclista e ao transporte público. “Se non implantamos o PMUS, dentro de 10 anos faranse uns 120.000 desprazamentos suplementarios en coche; o que equivale a 50.000 coches máis circulando na cidade, o que restaría espazo ás persoas e a outros modos de mobilidade. Estes 50.000 coches equivalerían a restar un quilómetro cadrado de espazos públicos á cidadanía, é dicir, unha superficie equivalente a 200 campos de fútbol ou aos barrios da Cidade Vella e Pescadería xuntos”, afirmou. Por este motivo, a Concellería de Mobilidade inclúe no PMUS outras medidas que tamén contribuirán a mellorar o uso do transporte público:

1. Implantación da tarifa plana para o bus urbano para a súa posta en funcionamento a principios do 2015, o que permitirá, no prazo de 10 anos, incrementar nun 68% o número de desprazamentos diarios no transporte público da cidade: pasar das 75.000 viaxes diarias que agora se realizan en bus ás 126.000 ao día no 2024.

2. Tarxeta Millennium Plus. Trátase dun modelo máis fiable e avanzado a nivel tecnolóxico e que permitirá solucionar os defectos de funcionamento que na actualidade se detectaron na tarxeta Millennium. O Concello atende así unha demanda dos usuarios do autobús e xa traballa tamén coa Xunta para que a nova tarxeta Millennium Plus sexa compatible co transporte metropolitano.

3. Mellorar a conexión cos hospitais e cos polígonos industriais como unha das medidas para potenciar a rede actual de buses urbanos. Esta medida favorecerá de maneira especial ás 20.000 persoas que traballan nos polígonos industriais da cidade. Será o paso previo á implantación dun sistema de calidade integral do transporte público urbano, obtendo así datos de satisfacción e necesidades reais dos actuais viaxeiros e dos potenciais usuarios.