A concelleira de Emprego, Comercio e Mercados, Diana Cabanas, visitou esta mañá as instalacións da Casa dos Xoguetes, unha iniciativa impulsada polo Concello nestas festas de Nadal co obxectivo de darlle unha segunda vida aos útiles e fomentar a súa reutilización.

Como xa é habitual por estas datas, a Casa das Xoguetes está habilitada nas dependencias da Oficina Municipal de Información ao Consumidor (OMIC), situada na rúa Costa da Palloza, 8. Cabanas lembrou que a campaña deste ano rematará o 3 de xaneiro.

"A chegada do Nadal supón unha boa ocasión para recalcar a importancia de promover a economía circular e o consumo responsable. Coa Casa dos Xoguetes, todas e todos os coruñeses poderán achegar aqueles xoguetes que xa non empreguen e que outros nenos e nenas poidan disfrutar deles, ao tempo que poderán levar os que mais lle gusten dos que están expostos e se correspondan co valor dos seus cupóns ", explicou Cabanas.

Baixo o lema Cambia de aventura, o Goberno de Inés Rey busca implicar á cidadanía nesta iniciativa solidaria que convida a reflexionar sobre o valor de compartir e o impacto positivo das nosas accións no entorno.

Esta mañá, Cabanas precisou que "a doazón de xoguetes estará habilitada entre o 1 e o 31 de decembro" e que o horario da Casa dos Xoguetes será de luns a venres (de 11:00 a 18:00 horas, ininterrompidamente), os sábados (de 11:00 a 14:00 horas) e con aperturas especiais os días 24 e 31 de decembro (de 11:00 a 14:00 horas). Os domingos e festivos a Casa dos Xoguetes estará pechada.

Neste primeiro día de actividade, alumnas e alumnos do CEE Nosa Señora de Lourdes visitaron a Casa dos Xoguetes, realizando as súas doazóns de útiles. No centro educativo coruñés están a desenvolver, precisamente, un proxecto de economía circular.

Actividades creativas para nenas e nenos de 4 a 10 anos, de balde

Na visita desta mañá ás instalacións da OMIC, Diana Cabanas recordou que, durante este Nadal e ata o 3 de xaneiro, a Casa dos Xoguetes ofrecerá obradoiros creativos e actividades lúdicas.

Entre as propostas destacan os obradoiros de reciclaxe e manualidades (postais de Nadal e de Reis, adornos sostibles, cápsulas de neve, xardineiras e xogos feitos con refugallo) e actividades lúdicas como contacontos, debuxo colaborativo e xogos do agasallo.

Todas as actividades son de balde e a inscrición pódese levar a cabo 15 minutos antes do inicio de cada sesión, na propia Casa dos Xoguetes.