Espazo TEU aberto de uso cidadán.
Os espazos TEU son unha rede de espazos abertos que o Concello da Coruña pon a disposición da cidadanía para o seu uso gratuíto público e aberto.
O Faro de Oza foi o primeiro TEU que abriu as súas portas no ano 2018 e trátase dun espazo de especial singularidade pola súa arquitectura e a súa localización sobre a praia de Oza.
Podes solicitalo para facer unha reunión, celebración, evento familiar, actividade formativa, social ou cultural, sempre que sexa sen ánimo de lucro.
Tes que ser maior de idade e estar empadroado/a na Coruña e podes solicitalos con carácter privado ou en representación dunha entidade ou asociación inscrita no REMAC ou dun colectivo informal con sede dentro do termo municipal da Coruña.
O tempo de uso é dun día completo, das 09.00 ás 22.00 horas.
Consta de dúas salas comunicadas por un vestíbulo e dous aseos, cun equipamento de mesas pregables, cadeiras amoreables e radiadores.
O Faro de Oza, polas súas especiais características, non ten facilidades de accesibilidade.
A capacidade máxima é, neste momento, de 50 persoas.
A historia do faro
A necesidade de protección fixo que se comezase a construír a batería de Oza xusto no lugar do ataque, como unha batería complementaria de San Diego para a defensa do litoral. É das máis antigas de costa construídas na Coruña, mencionada documentalmente en 1639. Constaba dun fortín con trazado estrelado, simétrico e regular, co espazo organizado en diferentes niveis que acollían edificios auxiliares para a tropa (almacéns, oficinas, habitacións...) e un foxo defensivo. Completaba o conxunto un parapeto con troneiras, unha bóveda de paso con porta levadiza e unha muralla defensiva cara á zona de terra. Desta muralla aínda se pode ver o extremo xunto á Facultade de Fisioterapia, o resto permanece enterrado.
A principios do século XX, os únicos faros que guiaban o acceso ao porto da Coruña eran a Torre de Hércules e o Faro de Cabo Prioriño e o ángulo das súas luces non garantían a posición correcta dos barcos durante a manobra de entrada. Por este motivo, en 1904, a Comisión de Faros decidiu instalar outro na punta de Oza, que serviría para guiar os buques que entrasen pola ría do Burgo.
O proxecto foille asignado ao enxeñeiro Salvador López Miño e a obra foille adxudicada a Juan Mosquera Morano, quen a finalizou en 1915 por case 30.000 pesetas. Está formado por dous pavillóns de 11x 5m aos dous lados do vestíbulo e dunha escaleira de servizo que leva a unha terraza. No seu centro érguese unha torre de dous corpos de muro que finaliza nun torreón coroado por unha lanterna cilíndrica metálica e unha pequena cúpula.
O 20 de agosto de 1917 o faro comezou a prestar servizo. En 1955, tras a construción do dique de abrigo, deixou de actuar como sistema de enfilación dos barcos e pasou a funcionar só como luz de referencia, ata 1963, ano no que pechou.
O faro foi abandonado durante décadas, ata que o lugar do antigo Sanatorio Marítimo de Oza foi declarado Conxunto Histórico-Artístico en 1992 e a Autoridade Portuaria decidiu rehabilitalo en 1996. Aínda así, ao non ter un uso continuado, volveu sufrir abandono e vandalismo e diversas asociacións e a propia veciñanza demandou en moitas ocasións a súa recuperación e o seu uso para a cidadanía. Finalmente, a Autoridade Portuaria cedeulle o uso do Faro de Oza ao Concello da Coruña e este aprobou nun Pleno de 2016 o cambio de uso de sanitario a cidadán.
En 2018, o Faro de Oza abriuse á cidadanía como un espazo de uso puntual, no que persoas físicas, asociacións ou entidades sen ánimo de lucro e colectivos informais que o desexen poden realizar actividades como unha celebración, reunión familiar, charla, reunión de traballo, actividade de formación ou calquera outra con proxección social ou cultural beneficiosa para a cidadanía.
Solicitude e autorización de uso do Faro de Oza
Se es unha persoa maior de idade, estás empadroado/a na Coruña e precisas un lugar onde poder realizar unha reunión, celebración, charla, asemblea, actividade de formación ou calquera outra social ou cultural sen ánimo de lucro, para ti ou en representación dunha asociación, entidade ou colectivo informal, podes solicitar o uso puntual do Faro de Oza.
Podes solicitar o seu uso para un día completo das 09.00 ás 22.00 h e a autorización é gratuíta.
Consulta o calendario de dispoñibilidade e realiza a solicitude seleccionando a data dispoñible que prefiras a través de cita previa.
Normativa xeral de solicitude e autorización
A solicitude de reserva para o uso privativo dun espazo TEU deberá ser cursada sempre por unha persoa física, que pode facelo en nome propio ou ben en representación dunha entidade xurídica (asociación, comunidade etc.). Os requisitos que se deben acreditar son os seguintes:
Os espazos da rede están dispoñibles para a súa reserva todos os días, incluíndo sábados, domingos e festivos, excepto cinco días ao ano en que permanecerán pechados: os días 24, 25 e 31 de decembro e os días 1 e 6 de xaneiro.
Pode solicitarse un día cunha antelación mínima de 15 días naturais antes da data desexada e un máximo de 60 días posteriores. O calendario mostrará os días dispoñibles.
De maneira excepcional, cando o tipo de actividade o precise e sexa de especial interese, o Concello da Coruña pode autorizar o uso dos espazos da rede durante dous días consecutivos. Para a aprobación desta excepción, ou de calquera outra solicitada, será preciso presentar unha pequena memoria descritiva da actividade para desenvolver que será convenientemente avaliada polo Servizo de Participación Cidadá e Innovación.
De maneira xeral, unha mesma persoa poderá utilizar un mesmo TEU un máximo de 12 días ao ano e un día ao mes.
A solicitude realizarase sempre a través do sistema xenérico de cita previa, o mesmo que se utiliza para numerosos procedementos municipais (https://citaprevia.coruna.gal/citaprevia/). Unicamente será necesario dispoñer dun terminal telefónico móbil, unha tableta ou un ordenador e ter unha conta de correo electrónico.
Non se aceptarán solicitudes de reserva que se presenten por calquera outro medio.
Unha vez realizada a solicitude de reserva, a persoa solicitante recibirá no seu correo electrónico o xustificante da solicitude no que aparecerá rexistrada a data e hora da solicitude, así como o código localizador.
As autorizacións de uso outorgaranse por estrita orde de presentación das solicitudes de reserva a través de cita previa.
O xustificante non implica de maneira directa a conformidade e a autorización de uso do TEU solicitado, posto que será necesario comprobar:
Unha vez comprobado que a solicitude non incumpre calquera dos puntos anteriores, procederase a formalizar a correspondente autorización que se lle remitirá, convenientemente asinada, por correo electrónico á persoa solicitante, xunto coas condicións de uso e as instrucións para a recollida e devolución das chaves do TEU cedido.
Por tanto, a confirmación da reserva non será efectiva ata a recepción do correo electrónico co documento de autorización asinado.
As autorizacións concédense para o uso dun local da rede durante un día completo, en horario das 9.00 ás 22.00 h.
A anulación dunha reserva ou a modificación da data solicitada deberá facerse a través do sistema de cita previa, utilizando o código localizador do xustificante da solicitude.
Denegación da solicitude de uso
O Concello da Coruña ten a facultade de denegar unha autorización de uso do espazo solicitado polos seguintes motivos:
En caso de denegación de autorización de uso, levarase a cabo unha comunicación previa a través do correo electrónico, e posteriormente enviarase a notificación da correspondente resolución de denegación motivada a través da caixa de correo electrónica ou, na súa falta, a través do correo electrónico.
Ademais, o Concello da Coruña poderá revogar unha autorización de uso xa confirmada, ben porque precise o espazo solicitado para levar a cabo unha actividade municipal, por razóns de seguridade ou sanitarias, ou por outros motivos xustificados ou motivados que así o aconsellen.
Condicións de uso
As demandas da sociedade e a necesidade de aproveitar os recursos públicos fan que se vaia tendendo a promover usos compartidos dos espazos municipais, tanto para as asociacións, que en moitos casos poden compartir espazos, como para a veciñanza, que demanda o uso puntual dos espazos públicos, coa intención de que moitas máis persoas se vexan beneficiadas dos recursos que son de todas e de todos.
Estas novas demandas fan que se busquen novas fórmulas que poidan satisfacer as necesidades da maior parte da cidadanía, como a autorización de uso puntual.
En todos os casos a autorización de uso dos TEU será GRATUÍTA.
O gozar do espazo efectuarase baixo a absoluta responsabilidade da persoa solicitante, e estará o Concello da Coruña eximido de calquera responsabilidade derivada do uso incorrecto das instalacións.
A persoa solicitante asinará unha declaración responsable, asumindo o cumprimento das condicións de uso que se expoñen a continuación.
Recollida e devolución das chaves de acceso
Para acceder ao TEU autorizado será preciso acudir previamente a recoller as chaves de acceso. As normas de recollida das chaves son as seguintes:
O punto de recollida das chaves do TEU Faro de Oza sitúase nas dependencias da Policía Municipal en María Pita das 9.00 ás 21.00 h.
En canto á devolución das chaves, levaranse ao momento de recollida que corresponda, no horario indicado, o seguinte día hábil posterior ao uso do espazo TEU. Non é preciso que a persoa solicitante faga a devolución en persoa.
Sentímolo pero o teu navegador é moi antigo para poder mostrar esta páxina. Debes de actualizalo ou usar un navegador compatible. Optimizamos esta web para Google Chrome, Mozilla Firefox, Opera, Safari e Microsoft Edge. Instalar agora un navegador compatible