Ana Lojo, mestra de inglés de Infantil e Primaria presenta na Biblioteca Ágora a súa novela "Marea morta" (Europa Ediciones, 2022), obra editada en España, Reino Unido, Italia e Alemaña en formato impreso e ata en quince países en formato dixital.

No evento, que terá lugar na sala de adultos da Biblioteca Ágora o venres 24 de novembro ás 19.00 horas, dará a coñecer tamén o seu libro de poemas "5" recentemente publicado en Europa Ediciones.

Sobre Ana Lojo Chan

Nada en Galicia, 1978. Mestra de inglés de Infantil e Primaria, comezou escribindo contos para o seu alumnado. Este hobby derivou en proxectos máis ambiciosos que enxalzan a sabedoría popular e a importancia da mestura de culturas.

O seu obxectivo era que tanto a súa filla como seu fillo recordaran aspectos relevantes da localidade na que se criaron e así foi que creou unha historia para que toda a información, recompilada tras anos de investigación de campo, resultase amena e entretida.

O seu tempo libre pásao lendo, escribindo ou facendo deporte. Non obstante, a súa verdadeira paixón é viaxar. Viviu unha tempada en Edimburgo e varias semanas en Canadá, Finlandia, o sur de Inglaterra e Irlanda. Ditas experiencias aportáronlle riqueza tanto no ámbito persoal como no profesional.

Máis información: unha charla con Ana Lojo Chan na páxina web de Europa Ediciones.