A alcaldesa, Inés Rey, visitou esta tarde a rúa Concepción Arenal con motivo do Día sen Coches, xornada coa que A Coruña pecha a programación da Semana Europea da Mobilidade 2026.

Durante a tarde, Concepción Arenal e a contorna da praza de Tabacos acolleron numerosas actividades abertas e gratuítas, entre elas circuítos de educación viaria, bicicleta e patinaxe, marcha nórdica, zumba, exhibicións de ximnasia artística, freestyle e danza urbana, así como unha mesa redonda sobre mobilidade, calidade do aire e ruído.

Rey percorreu os diferentes espazos e compartiu a xornada coas entidades participantes e coas persoas que se achegaron á zona. A alcaldesa destacou que o Día sen Coches permite "ver que pasa na cidade cando as persoas recuperan o espazo público e como podemos avanzar cara a rúas máis pensadas para todos e todas".

A xornada pon o punto final a sete días de actividades da Semana Europea da Mobilidade, que desde o pasado mércores levou á praza de Tabacos e a diferentes puntos da cidade propostas de divulgación, sensibilización e participación arredor dunha mobilidade máis sostible, segura e accesible.