Hoxe tivo lugar no Ágora a entrega de premios para as obras gañadoras dos colexios de secundaria do certame Cinema na Escola, despois de que onte se dese a coñecer o palmarés dos/as participantes de primaria noutro acto no mesmo lugar. O proxecto escollido polo xurado foi "Soliloquio", do CPR Franciscanas.

Cinema na Escola é un innovador concurso audiovisual organizado polo Concello que tivo unha gran participación do alumnado dos centros públicos da cidade, con máis de 800 estudantes e 22 docentes de 17 centros educativos implicados. A obra "Zona 0" foi onte a agraciada na categoría de Mellor Curtametraxe de primaria. 

"Con esta segunda gala pechamos unha edición de Cinema na Escola que foi todo un éxito. O nivel das pezas presentadas foi altísimo e a decisión do xurado foi moi difícil, o cal quere dicir que a escola cinematográfica coruñesa ten canteira, e o Goberno de Inés Rey vai estar alí para apoiala", subliñou o concelleiro de Educación, Formación e Innovación Tecnolóxica, Juan Ignacio Borrego, quen estivo presente en ambas as galas en representación do Concello.

Este programa busca inculcar na xuventude a expresión audiovisual a través da produción de curtametraxes propias. As persoas participantes tiveron que desenvolver todas as fases do proceso, desde a actuación á escritura, a dirección, a produción e a montaxe. Así, centos de alumnos e alumnas achéganse por primeira vez ás técnicas propias desta disciplina artística. 

Na gala de hoxe, participaron os seguintes centros de secundaria:

• IES Agra do Orzán coa curta "O móbil"

• IES Elviña coa curta "Foliada eclipsada"

• IES Eusebio da Garda coa curta "Fogar"

• IES Rafael Puga Ramón coa curta "Micelio"

• IES Rafael Dieste coa curta "Log out"

• IES Ramón Menéndez Pidal coa curta "Descoñecidos"

• IES Salvador de Madariaga coa curta "O recado"

• CPR Franciscanas coa curta "Soliloquio"

• CPR Franciascanos coa curta "Cookies"

Todas as obras foron rodadas en galego e co teléfono móbil como instrumento de gravación. Ademais, impartíronselles talleres formativos de iniciación á creación audiovisual e formación e asesoramento presenciais nas tarefas de filmación e montaxe, co obxecto de darlle ferramentas ao alumnado para poder elaborar unha curtametraxe. 

Os galardóns foron deliberados por un xurado de persoas expertas composto polo actor de escena e dobraxe Santiago Fernández; a directora de casting Isa Escrigas; a doutora en fotografía por Belas Artes Ledi Bellón; o realizador e montador gañador dun Goya Fran X. Rodríguez e a técnica de Educación do Concello Ana Judel Prieto. 

O palmarés completo foi:

• Mellor Curtametraxe: "Soliloquio" (CPR Franciscanas)

• Mellor Guión: "Soliloquio" (CPR Franciscanas)

• Mellor Fotografía: "Fogar" (IES Eusebio da Guarda)

• Mellores Efectos Visuais: "Cookies" (CPR Franciscanos)

• Mellor Edición e Montaxe: "Log out" (IES Rafael Dieste)

• Mellor Edición de Audio: "Foliada eclipsada" (IES Elviña)

• Mellor Interpretación: "Soliloquio" (CPR Franciscanas)

• Mención Valores: "Descoñecidos" (IES Ramón Menéndez Pidal)

• Mención Esforzo: "Foliada eclipsada" (IES Elviña)

• Mención Comedia: "Micelio" (IES Rafael Puga Ramón)

• Premio do público: "O móbil" (IES Agra do Orzán)