O Concello avanza co plan de remodelación dos Cantóns, que pouco a pouco vai deixando entrever a nova imaxe de infraestruturas como o novo carril bici que conectará a praza de Mina coa contorna da Autoridade Portuaria, un percorrido de aproximadamente 650 metros que se completará nos vindeiros meses.

O trazado, que bordea espazos como os xardíns de Méndez Núñez e o Teatro Colón, xa está aberto ao tránsito de forma parcial entre a Marina e Entrexardíns, treito onde a urbanización do carril, bidireccional e de 3 metros de ancho, xa está practicamente completada. Neste sentido, cómpre destacar a súa segregación da calzada e das beirarrúas, reforzando así a seguridade viaria das persoas usuarias.

Esta segregación total favorece aspectos moi específicos da circulación en vías ciclables. Por exemplo, os primeiros contactos a bordo dunha bicicleta, propicio para familias con crianzas. Ademais, outra cuestión moi destacada do novo carril bici direccional chega ata o novo paso peonil coa rúa Sánchez Bregua, o que permitirá suprimir un pequeno treito que se habilitou tempo atrás sobre a beirarrúa que bordea Méndez Núñez.

A alcaldesa, Inés Rey, explicou o proceso que levou á execución deste novo carril bici, que substitúe ao trazado provisional que bordeaba anteriormente o Cantón Grande. "Durante a pandemia da covid-19, e atendendo á normativa sanitaria vixente por aquel entón, ampliamos a superficie peonil dos Cantóns para facilitar o tránsito con distancia de seguridade. Foi unha medida que tamén nos serviu de proba piloto para valorar a aceptación dunha remodelación dos Cantóns no futuro", indicou a rexedora.

Neste contexto, tamén se habilitou un carril bici provisional que marcou, en certa forma, o punto de partida do trazado actual, mellorado, xa adaptado á configuración definitiva dos Cantóns, conectado ao novo treito da rúa Nova e coa previsión de que teña accesos directos ás bases do servizo municipal BiciCoruña. 

A este respecto, nas vindeiras semanas está programada a reubicación da estación de BiciCoruña existente no Cantón Grande, para ubicarla na contorna do carril bici.