As obras de remodelación dos Cantóns, promovidas polo Concello, suporán unha transformación clave do corazón da cidade, que gañará accesibilidade, máis espazos peonís, áreas verdes e, ademais, reducirá a superficie de asfalto dunha forma considerable, o que tamén suporá unha mellora substancial da contorna en termos de sostibilidade.

Ata a posta en marcha da súa remodelación, os Cantóns contaban con case 16.000 metros cadrados de aglomerado. Isto é, a capa de pavimento correspondente á calzada. Agora, coas actuacións previstas entre a praza de Mina e o Teatro Colón, o Concello reducirá o asfalto dos Cantóns á metade, unha actuación clave en materia medioambiental xa que medidas como esta contribúen tamén á redución de temperaturas extremas. Cómpre lembrar que o asfalto convencional impide a infiltración de auga e acumula calor.

Os informes técnicos da dirección de obra reflicten que, cando rematen as obras dos Cantóns, a superficie de asfalto será de aproximadamente 6.700 metros cadrados. Esta redución dos espazos pavimentados con asfalto será a que permitirá gañar a superficie peonil que se está a habilitar na contorna do Obelisco, o Cantón Grande e o Cantón Pequeno, proximamente tamén en Entrexardíns.

En total, está previsto que os Cantóns conten con 5.000 metros cadrados máis de espazos peonís con respecto á súa imaxe previa, con máis superficie de granito e baldosa hidráulica.

É de subliñar que, en todo caso, a circulación do tránsito rodado polos Cantóns seguirá estando habilitada, con dous carrís -un por sentido- por onde poderán transitar os automóbiles e os vehículos correspondentes ao transporte público, tanto autobuses urbanos, como interurbanos e taxis. "O que durante a pandemia todos puideron apreciar disfrutando do espazo público cobra agora a súa configuración definita, con moito menos asfalto, máis enlousado e máis verde. É unha actuación da que pronto poderá gozar todos os cidadáns, que ademais gañarán un xardín histórico que deixara de estar partido por unha carreteira ", indicou a alcaldesa, Inés Rey. 

As áreas verdes nos Cantóns triplicaranse coa intervención que está en marcha

Outro dos aspectos destacados da remodelación dos Cantóns será a superficie verde que se gañará tras o remate dos traballos, que tamén permitirán mellorar as conexións cun dos principais pulmóns da cidade: os xardíns de Méndez Núñez.

Anteriormente, o ámbito da obra dos Cantóns contaba cunha superficie de 450 metros cadrados de áreas axardinadas, correspondentes ás medianeiras e a pequenos parterres. 

Coa intervención que está en marcha, esta superficie triplicarase ata os 1.300 metros cadrados, e será especialmente visible a ras de solo, coas especies arbustivas que se incorporarán ás novas medianeiras, que segregarán o carril-bici dos carrís destinados ao tráfico rodado, entre a praza de Mina e o Teatro Colón. Estas tarefas, como é habitual no referente á xardinaría, sempre se executan no treito final das obras.

Ademais, as obras nos Cantóns contemplan a plantación de, como mínimo, 17 novas árbores. Varios destes exemplares, en fase inicial de crecemento, xa están repartidos entre as rúas Manuel Casás (6), o Obelisco (4), e Santa Catalina (5). Ademais, está previsto dispor máis exemplares na praza de Mina e na bancada circular que hai fronte á Fundación Barrié.