Antón Gómez López e Noa Mirantes Santos conseguiron a vitoria na categoría absoluta da Carreira Popular Matogrande - Xuxán, que se celebrou este domingo e congregou nas súas distintas categorías a case 1.400 persoas. A praza central de Xuxán foi o punto de encontro desde o que partiron as distintas carreiras.

"O circuíto Coruña Corre amosa unha vez máis a súa boa saúde, superando o número de asistentes do pasado ano e integrando novas zonas ás súas carreiras, grazas ao traballo do Goberno de Inés Rey por expandir este programa", indicou Manuel Vázquez, concelleiro de Deportes, que participou na saída e na entrega de medallas da proba. 

Ademais de Antón Gómez, na categoría masculina completaron o podio Abdelaziz Fatihi como segundo e Daniel Fuentes Bardanca como terceiro. Na categoría feminina as tres primeiras atletas foron Noa Mirantes Santos, Vanesa Hervada López e Noelia Papín Estévez. Na categoría sub-18 masculino os gañadores foron Enrique Cuiña Fernández e Alba Morales Pedreira. Na sub-16, Antón Viña López e Alba Bacariza Ramos.

Deste xeito, o circuíto Coruña Corre xa celebrou as súas dúas primeiras carreiras do ano. Nos vindeiros días está previsto que se abra a inscrición para a terceira carreira do ano, a de San Pedro de Visma do 10 de maio. Tamén en maio se celebrará a carreira dos Rosales, o día 31, antes do parón de verán.