A Concellería de Culturas, Deporte e Coñecemento vén de anunciar que mañá, mércores 15, abrirá o prazo de preinscrición para solicitar praza nos campamentos de verán das Casa Museo Municipais Casares Quiroga, Picasso e María Pita. O obxectivo destas actividades, gratuítas para as e os participantes, é achegar ás nenas e nenos as figuras protagonistas destes centros culturais e a súa historia a través de xogos, saídas ao exterior, obradoiros e actividades de expresión artística.

Os campamentos están dirixidos a menores con idades comprendidas entre os 5 e os 12 anos cumpridos no momento de comezar as actividades, que se desenvolverán en horario de mañá, de 10 a 14 horas, con posibilidade de gozar de horario ampliado de 9 a 15 horas baixo demanda. Terán lugar ao longo do período estival en cinco quendas diferenciadas: do 27 de xuño ao 1 de xullo; do 4 ao 15 de xullo; do 18 ao 29 de xullo; do 1 ao 12 de agosto; e do 17 ao 31 de agosto.

As preinscrición e reserva de praza poderá realizarse os días 15, 16 e 17 de xuño de forma presencial ou a través do teléfono, chamando ás Casas Museo no seu horario de apertura, independientemente de que sexa ou non a ubicación que se solicita; e tamén por correo electrónico a través da dirección casasmuseo@coruna.es, enviando un correo co nome e apelidos da ou do menor, data de nacemento, alerxias ou datos de interese, e quendas nas que solicita participar.

Poderán solicitarse días soltos ou quendas enteiras, cuxas e cuxos demandantes terán preferencia na posterior adxudicación da praza, en caso de así solicitala, sobre quen realice a preinscrición para días determinados. Unha vez rematado o prazo, a publicación da lista de admisións definitiva e a formalización das inscricións realizarase os días 22 e 23 de xuño en horario de 11 a 14 horas nas Casas Museo.