As festas de agosto organizadas este ano polo Concello da Coruña teñen unhas máximas fundamentais: mesturar tradición con innovación, apoiar aos creadores locais, descentralizar os festexos e potenciar a oferta nos barrios. E todo isto, ademais, cun considerable aforro con respecto ás actividades de anos pasados. En base a estes principios, o Goberno local presenta as diversas actividades que terán lugar entre o 18 e o 30 de agosto nos barrios do Castrillón, Eirís, Oza-Gaiteira, As Flores, San Cristovo das Viñas, Pedralonga e Novo Mesoiro.

Na súa aposta por descentralizar as festas, e non organizar unicamente actividades na zona centro da cidade, o Goberno local decidiu potenciar a oferta lúdica naqueles barrios que celebran tradicionalmente os seus festexos no mes de agosto. A Concellería de Culturas, Deporte e Coñecemento, dirixida por José Manuel Sande, destaca ademais, a clara aposta pola “pluralidade” nos barrios.

Por iso, os programas dos distintos barrios conteñen actuacións para todas as idades (actividades infantís, inchables, espectáculos de monicreques, xogos e deportes tradicionais), así como músicas de todos os estilos, dende orquestras até festivais como o DenomeRock en Novo Mesoiro ou o do Barrio das Flores.

Sande destaca a importancia que tiveron nestas festas os grupos locais, “tamén nos barrios”. De feito, a oferta lúdica que se ofrece está conformada na súa maioría por espectáculos de artistas galegos.

Por outro lado, nestas festas dos barrios que se desenvolverán até final de mes, o Concello apostou, como no conxunto de todos os festexos de agosto, por unha oferta variada, pero máis económica que a de exercicios anteriores . “Unhas festas máis baratas que as do ano pasado, cuxo gasto estaba en crecemento constante, non quere dicir para nada que sexan peores”, explica o concelleiro de Culturas.

As festas en Castrillón-Urbanización Soto terán lugar entre o 18 e o 19 de agosto e, entre outras actividades, contará con concerto de Sherpa (ex de Barón Rojo) e o grupo local de rock Exit. As de Oza-Gaiteira-Os Castros celebraranse entre os días 20 e 21, cos concertos de Vaamonde, Lamas e Romero e de Ataque Escampe. Eirís terá o xoves 20 a súa tradicional Festa da Fresa, e pechará a xornada do 20 de agosto cunha gran verbena coa Orquestra Sintonía. O 22 de agosto tocaralle o turno ás festas de San Cristovo das Viñas, que terán sesión vermú, inchables e á Orquestra Marca. As festas no Barrio das Flores tamén se celebrarán entre os días 21 e 22. Ademais de numerosas actividades infantís, contará cun festival onde actuarán Diego Frikipaldi, Pel de Oso, Tregua e Chotokoeu, e coa actuación da Orquestra Acuarela. A Orquestra Armonía pechará os festexos de Pedralonga, o próximo 21 de agosto, mentres que entre os días 28 e 30 serán os de Novo Mesoiro, nas que se potenciarán as actividades deportivas e infantís, así como músicas máis alternativas no Festival DenomeRock, no que actuará Miguel Costas (ex de Siniestro Total), Dakidarría e Trapallada.