O concelleiro de Rexeneración Urbana e Dereito á Vivenda, Xiao Varela, mantivo este xoves unha xuntanza con representantes da asociación veciñal do Castrillón-Urbanización Soto 'IAR' para presentar a proposta técnica que o Concello ten previsto executar nas próximas semanas na rúa Montiño, un proxecto "dirixido a resolver os problemas de recollida de pluviais e escorrentías que sofre esta vía, derivados da súa pendente, e mellorar a seguridade peonil". Como salienta o responsable municipal, a reunión serviu tamén para recoller as achegas e propostas da veciñanza sobre o proxecto, que nos próximos días será presentado tamén a outras asociacións da contorna, que serán convocadas "para realizar o mesmo intercambio de ideas". O proxecto responde, como salienta o concelleiro, "a unha demanda histórica do barrio, ademais de exemplificar o tipo de actuacións que o Goberno local está a desenvolver nos barrios, atendendo as necesidades da veciñanza e con obras que, sen supoñer un investimento desproporcionado, teñan un impacto para mellorar a vida das persoas". Como destaca Varela, estas intervencións "de acupuntura urbana" encamíñanse tamén "a seguir avanzando nunha cidade para as persoas, para os peóns, buscando a accesibilidade universal do espazo público". Suporá un investimento de 180.000 euros e terá un prazo de execución de catro meses, de xeito que estará rematada no primeiro trimestre do próximo ano.

Na reunión mantida esta mañá coa asociación veciñal plantexáronse outros proxectos para o barrio, como o do centro deportivo do Castrillón, do que o responsable de Rexeneración Urbana confirmou que terá unha xestión pública. "Incluiremos nos Orzamentos municipais o acondicionamento interior do complexo", reafirmou. Ademais, na xuntanza abordáronse outras intervencións, como a colocación de parques biosaudables na praza de Pablo Iglesias, que se levará a cabo este ano, e outras vinculadas ás infraestruturas.