Os Museos Científicos Coruñeses, fieis ao seu compromiso de divulgación da ciencia á cidadanía, ofrecerán esta fin de semana unha programación complementaria ás sesións da fin de semana no Planetario da Casa das Ciencias co gallo da próxima eclipse de Lúa do vindeiro luns.

Na madrugada do próximo luns, 28 de setembro, a Terra interpoñerase entre a Lúa e o Sol, proxectando a súa sombra sobre o noso satélite. Producirase así unha eclipse total durante o que a Lúa se escurecerá notablemente e adquirirá un leve ton avermellado. O máximo da eclipse terá lugar ás 4.47 (hora peninsular española), aínda que a fase de totalidade prolongarase durante algo máis dunha hora.

Para entender as implicacións e a orixe deste fenómeno, durante o venres 25, sábado 26 e domingo 27, todas as sesións do planetario da Casa das Ciencias complementaranse cunha breve explicación da eclipse utilizando os recursos do planetario dixital.