O concelleiro de Culturas, Deporte e Coñecemento, José Manuel Sande, presentou esta mañá Tropical, a nova produción da compañía coruñesa Elefante Elegante, cuxa estrea terá lugar esta fin de semana no Teatro Rosalía Castro. O edil lembrou que, á marxe da programación da tempada do Ciclo Principal, presentada o pasado mes de decembro, e que se desenvolverá até o vindeiro 27 de maio, o Goberno local "apoia puntualmente", dentro do seu compromiso coa visibilización das e dos creadores locais, "estreas de produción do tecido coruñés e galego" no recinto municipal, "neste caso, ademais, a dunha compañía asentada, de longa e nutrida traxectoria". Así, o venres 17 e o sábado 18, ás 20.30 horas, o público coruñés poderá asistir á representación dunha obra, dirixida por María Torres e Gonçalo Guerreiro, "que xira arredor do concepto da viaxe", sinalou Sande.

O espectáculo, de teatro xestual, narra, desde a ironía e o absurdo, a viaxe de cinco grupos de persoas --turistas, migrantes, refuxiadas, músicas e forzas da orde-- ao bordo do barco Tropical. "A obra só conta con tres intervencións textuais, que teñen, incluso, unha presenza inferior ao circo, a imaxe ou a danza", explicou Guerreiro, "xa que preferimos traballar unha linguaxe que sexa universal, que se pode seguir a través do que vai acontecendo, alén do que se vai narrando". A compañía contou coa colaboración do antropólogo Carlos Diz no asesoramento da peza, "coa idea de conseguir desenvolver traballo artístico e antropolóxico", explicou Guerreiro. Neste sentido, Diz cualificou de "innovadora" a incorporación "da discusión da realidade" ao espectáculo que fai Elegante Elegante, "nun momento social, histórico e político concreto como o actual, no que a situación convida a experimentar".

As entradas están á venda no despacho de billetes da praza de Ourense e Ticketea desde 6,50 euros. Coma sempre, todas as persoas posuidoras do abono do Ciclo Principal terán un 25% de desconto na súa entrada. Tamén gozarán de bonificación aquelas que dispoñan de Carné Xove, teñan máis de 65 anos ou se atopen en situación de desemprego.