A alcadesa da Coruña, Inés Rey, participou hoxe na inauguración do V Encontro Nacional de Xoves de Down España que ten lugar estes días na cidade. Segundo Rey, a asociación coruñesa é un referente na cidade pola súa política de formación e inclusión social.

"Esta é unha oportunidade para coñecervos, para coñecer esta cidade, pero sobre todo é unha oportunidade para poñer en valor as políticas que temos que pór en práctica. Temos que imitar a esta entidade coruñesa na formación destes coruñeses e coruñesas co fin de que poidan acceder ao mercado laboral. Trátase de xerar novas oportunidades que poden ser fundamentais para fomentar a inclusión laboral das persoas con discapacidade intelectual".

"Hoxe aquí  practícase a visibilidade, pero sodes vós os que tedes moito que ensinarnos a todos. Terédesnos sempre ao voso lado".

Neste encontro as persoas usuarias das diferentes entidades que forman parte de Down España poderán gozar dunha gran fin de semana repleta de actividades a través das cales poderán coñecer outras experiencias de vida e gozar de vivencias moi enriquecedoras en encadres da cidade moi especiais.

Ademais de gozar e coñecer a outras persoas de diferentes partes de España, outro obxectivo do encontro é reflexionar xuntos sobre o seu presente e futuro, debater sobre temas de interese para eles e compartir inquietudes.