Inés Rey foi investida este sábado, 15 de xuño, primeira alcaldesa democrática da Coruña logo de obter 17 votos a favor dos membros da nova Corporación municipal (os 9 do PSOE, os 6 da Marea Atlántica e 2 do BNG), nunha sesión plenaria que foi seguida por centos de persoas dentro do propio Pazo de María Pita; e por outras moitas na praza ou mediante a retransmisión por internet. Pola súa banda, a concelleira popular Beatriz Mato, que tamén optou á Alcaldía, recibiu os 9 votos do seu partido, mentres que a candidata de Ciudadanos, Mónica Martínez, logrou 1 voto, o seu propio.

A nova alcaldesa comezou o seu discurso lembrando o fito histórico que supuxo na cidade a súa investidura: "Tiveron que pasar 40 anos para que sexa unha muller, unha coruñesa que nin sequera nacera daquela, quen teña a honra de recibir da man da súa veciñanza o cargo político máis relevante que existe e existirá no mundo: o de alcaldesa. Hoxe, por primeira vez na nosa democracia, unha muller é investida alcaldesa da Coruña. E quero e debo ser todas as mulleres desta cidade. Ser a alcaldesa de todas. E de todos. Todos os días. Todos os 8 de marzo, o de hoxe, o de mañá e os de sempre. Como o que agora, neste Salón de Plenos, celebra unha xornada histórica, que xusto por iso só podo comezar con humildade e agradecemento".

Tamén citou e lembrou a varias ilustres coruñesas como Teresa Herrera, Concepción Arenal, Emilia Pardo Bazán, Juana de Vega, Marcela Gracia e Elisa Sánchez, e a María Pita. "Todas perseguiron o seu soño. Todas loitaron por el. Imos seguir o seu exemplo. Quen teña honra, que me siga", sinalounos. Imos seguir tras ela. "Unha con todas, con todos...".

Na sesión plenaria de investidura, Rey avogou por recuperar o diálogo social e por alcanzar un alto grao de consenso co resto das forzas da Corporación. "E quéroo facer nunha cidade que alcanzou os seus mellores logros cando se uniu e superou diferenzas grazas ao consenso. Por iso, quero e traballarei para que este mandato municipal sexa o da amabilidade, o dos acordos. Demándanolo a cidadanía. E debémonos só a ela".

Entre as súas prioridades, deixou patente o seu proxecto de recuperación dos barrios. "Traballarei para que os nosos barrios recuperen o protagonismo que merecen, coa dinamización dos mercados, con novos servizos, con apoio ao pequeno comercio, con novos centros cívicos, para que volvan a ser espazos de convivencia, orgullo e sinal de identidade da nosa cidade".

Así mesmo, expuxo retos concretos como a súa aposta por unha cidade moderna: "Creo nunha Coruña que apoie e se apoie na nosa Universidade, na súa capacidade de innovación, na súa contribución ao desenvolvemento científico e tecnolóxico, ao progreso económico, ao ascenso social sobre a base do mérito, a capacidade, o talento. Creo nunha cidade que non deixe ninguén atrás. Creo nesta cidade como un modelo de éxito e por iso quero seguir loitando cos traballadores dos nosos sectores industriais ameazados, como o están os de ALCOA,  FERROATLÁNTICA e ISOWAT. E agora, xa como alcaldesa, defenderei os vosos postos de traballo e o voso futuro porque tamén é o futuro da nosa cidade".

Rey deixou patente a súa aposta decidida por levar a cabo unha serie de proxectos concretos que ve como imprescindibles para o crecemento da cidade. "Creo nunha cidade moderna na que se coiden os espazos públicos e onde apostemos por un urbanismo sustentable, a mesma cidade que foi capaz de debuxar o sorriso dunha das nosas baías e que agora temos o reto de facelo no outro costado co desenvolvemento da fachada marítima, deseñar esa cidade do futuro que é o legado que lles poderemos deixar ás próximas xeracións. E para iso será necesario desbloquearmos as grandes infraestruturas que están pendentes de executar, como a conexión por tren a Langosteira, a rede viaria 18 ou a estación Intermodal, entre outras. Todas elas son imprescindibles para que esta cidade recupere o liderado económico e social".