O concelleiro de Culturas, Deporte e Coñecemento, José Manuel Sande, presentou esta mañá os concertos especiais que ofrecerá este mes de xuño a Banda Municipal de Música da Coruña, a cal cualificou como "unha institución musical de referencia". Serán tres as actuacións que terán lugar os días 9, 25 e 28 de xuño ás 20.00 horas no auditorio do Centro Ágora, e nas que a agrupación que dirixe Andrés Valero-Castells, "que foi escollido polos propios membros da banda", lembrou o edil, interpretará diversas obras de múltiples estilos, desde composicións do músico coruñés Nani García, ata versións de bandas de rock como AC/DC, así como unha homenaxe aos anteriores directores da banda.  

O primeiro concerto da serie será o 9 de xuño, no que se presentará The Wind Factor, un traballo da Banda Municipal que contará co seu clarinete baixo Xocas Meijide como solista, e composta por Nani García. Ademais, neste concerto extraordinario terá lugar a estrea absoluta de  For Whom The Idiophones Toll?, o último traballo para banda do músico coruñés, quen salientou que a agrupación municipal coruñesa "é unha das mellores" do Estado.

A seguinte cita coa Banda de Música no Centro Ágora será o día 25, no que a agrupación ofrecerá unha homenaxe ao rock na que se interpretarán adaptacións de temas de grupos e solistas coma Guns N'Roses, Deep Purple, AC/DC, The Beatles ou Sherpa.

Finalmente, pecharase este ciclo especial no auditorio do centro municipal da Agra do Orzán cun concerto homenaxe aos anteriores directores da banda, como Rogelio Groba, Indalecio Fernández Groba, José Ramón Sierra, Xosé Carlos García, Marcel Van Bree e José Luis Represas, e tamén ao actual director titular, Andrés Valero-Castells. Este concerto tamén servirá para render tributo ao veterano crítico musical coruñés Julio Andrade Malde.