A Domus acollerá o próximo sábado, 5 de novembro, a celebración da quinta edición da Feira OSHWDem (Open Source HardWare Demonstration), un evento aberto e participativo arredor da tecnoloxía libre. O encontro está organizado pola asociación Bricolabs, entidade que desenvolve as súas actividades na coñecida Sala Maker da Domus --que hoxe celebra o primeiro aniversario da súa inauguración-- , coa colaboración do propio museo científico. Co obxectivo de achegar a cultura científica e a tecnoloxía aberta á cidadanía, a Concellería de Culturas, Deporte e Coñecemento, dirixida por José Manuel Sande, facilitará o acceso da veciñanza á Domus ofrecendo a entrada gratuíta durante todo o día.

A xornada comezará ás 10.00 horas, coa apertura do museo, e na súa programación inclúe  multitude de actividades dirixidas a todos os públicos, desde a exhibición de máis de 40 proxectos vencellados á electrónica libre, ata pequenas charlas, concursos, competicións de robótica e obradoiros. Para máis información, pode visitarse a páxina web da feira http://oshwdem.org/ así como o espazo dos Museos Científicos Coruñeses na rede