A Torre de Hércules rexistrou entre os meses de xaneiro e maio a visita de 31.906 persoas. As visitas ao monumento, que este mes de xuño celebra o seu sétimo aniversario como Patrimonio da Humanidade, superan as cifras dos primeiros meses do ano anterior, no que 30.970 persoas pasaron polos tornos do faro. Neste sentido, a Torre mantén a tendencia ascendente iniciada o pasado verán en canto á mellora do número de visitantes, cando rematou 2015 co mellor rexistro dos últimos tres anos, acadando 117.427 visitas, un dato que superou ás obtidas nos anos anteriores ( 113.849 no 2014 116.946 persoas no 2013).

O mes que máis visitas se rexistraron do que vai de 2016 foi marzo, con 9.101 visitas, mentres que maio foi o segundo mes con máis tránsito, con 9.070 visitantes; namentres en abril houbo 6.998, en xaneiro, 3.372 e, en febreiro, 3.365.

A maior chegada de turistas agárdase a partir deste mes de xuño, no que a Torre amplía o seu horario de verán. Desde hoxe, o faro romano manterá abertas as portas desde as 10 até as 21 horas, sen interrupción, e fixará ás 20.30 horas o último acceso ao seu interior. Este horario manterase ata finais de setembro, cando recupere como horario habitual de peche as 18 horas. En previsión tamén da numerosa afluencia de turistas, e para permitir unha correcta dinamización do fluxo de visitantes, desde o 15 de xuño non se poderán reservar guiadas ao faro.

Por outra parte, e para celebrar os sete anos da Torre de Hércules na lista de Patrimonio Mundial da Unesco (27 de xuño), o Consorcio de Turismo da Coruña celebrará distintas actividades entre as que, como principal novidade, se atopa a convocatoria dun concurso de fotografía e vídeo a través das redes sociais. O certame abre hoxe o prazo de participación, que se manterá aberto durante todo o mes, e busca promover contido en Instagram e Youtube xerado polas usuarias e usuarios das redes arredor da figura do faro romano.

As persoas participantes poderán subir as súas fotografías en Instagram nunha publicación mencionando a conta oficial @torrehercules, que estará acompañada pola ubicación da mesma e a  etiqueta #7aniversariopatrimoniomundial. Pola súa banda, quen desexe participar no concurso audiovisual, poderán enviar os seus vídeos, dun minuto como máximo de duración, ao correo electrónico torredeherculesonline@gmail.com para que aparezan na canle oficial de Youtube http://www.youtube.com/user/torreherculesacoruna.

As e os autores dos contidos que acaden maior popularidade obterán premios en metálico. As bases do concurso están dispoñibles na web www.torredeherculesacoruna.com