O Concello da Coruña reafirma o seu compromiso co sector artesanal galego e colabora coa Asociación Galega de Artesáns na organización de Oficios en Acción, unha nova xornada de divulgación e posta en valor da artesanía que terá lugar o sábado 11 de abril no Centro Sociocultural Ágora. O evento, de acceso gratuíto e aberto a todos os públicos, busca achegar á cidadanía o traballo artesanal mediante obradoiros impartidos por profesionais do sector. Durante a xornada as persoas asistentes terán a oportunidade de participar en diferentes actividades de xoiería, lá, tea, papel...

O concelleiro de Cultura, Gonzalo Castro, destacou a importancia de iniciativas como Oficios en Acción para a preservar e difundir das técnicas tradicionais da artesanía galega. "A artesanía forma parte do noso patrimonio cultural e merece un espazo de recoñecemento e promoción", afirmou. A programación do evento inclúe obradoiros especializados nos que os participantes aprenderán diferentes técnicas:

Aula 6

Víctor Ares: Elaboración de pezas feitas con técnica de churros ou copiando unha peza de mostra, para a reprodución de partes do corpo, nariz, boca, ollos, orellas... coa técnica do modelaxe. 10 persoas por quenda, sen inscrición previa. Pódese participar a partir dos 6 anos.

Mauve: Elaboración dunha peza de xoiería mediante a técnica de microfusión a partir dun modelo realizado en cera. Quendas de 3 horas. Mañá e tarde. 5 persoas por quenda. Só para adultos.

Aula 7

Casperlota: Obradoiro no que se crearán pequenas pezas, combinando deseño, técnica e creatividade con feltro de lá e bordado a man. Quendas de 1,5 horas. Dúas pola mañá e dúas pola tarde. 6 persoas por quenda. Pódese participar a partir dos 9 anos.

El taller muy secreto: Elaboración dun móbil de medusas de tea montado nun pao recollido na praia. Quendas de 3 horas. Mañá e tarde. 8 persoas por quenda. Só para adultos.

Aula 8

Hana no Boshi: Deseño e confección dun toucado con estrutura etérea en Sinamay, fibra vexetal natural. Imprescindible ter coñecementos básicos de costura. Quendas de 3 horas. Mañá e tarde. 6 persoas por quenda. Pódese participar a partir dos 13 anos.

Mioco Deseños: Obradoiro de pregado de libros. Os participantes poderán pregar as follas dun libro a través dunha plantilla con forma de corazón. Quendas de 3 horas. Mañá e tarde. 6 persoas por quenda. Pódese participar a partir dos 14 anos.

Aula 9

Artesanos del Altillo: Obradoiro de xoguetes en madeira, lixar, recortar con segueta, pintar, vernizar e montaxe do xoguete elixido. Quendas de 3 horas. Mañá e tarde. 9 persoas por quenda. Pódese participar a partir dos 4 anos.

Artesanía Nia: Elaboración de canudos co punto básico de Miyuki, para a creación dun colgante con forma de flor. Quendas de 3 horas. Mañá e tarde. 7 persoas por quenda. Participación a partir dos 13 anos.

Juan M. López Casás: Introdución as técnicas de encadernación artesanal. Quendas de 3 horas. Na quenda de mañá encadernación en tapa dura e pola tarde coa técnica de cosido vista semi rixida. 8 persoas por quenda. Pódese participar a partir dos 10 anos.

A organización lembra que os menores de idade deberán estar acompañados dunha persoa adulta durante as actividades. Ademais, debido á capacidade limitada, recoméndase realizar a inscrición previa a través da web www.galegadeartesans.org/oficiosenaccion/.