O Concello está a acometer unha mellora na seguridade viaria e na mobilidade na intersección entre a rúa Modesta Goicouría e a praza de Pontevedra coa colocación de dúas balizas semafóricas no paso peonil. Esta actuación lévase a cabo para reforzar a protección nunha zona próxima ao IES Plurilingüe Eusebio da Guarda e ao CEIP Eusebio da Guarda e que, por tanto, ten unha grande afluencia peonil de estudantes, especialmente nas horas de entrada e saída dos centros.

A intervención consiste na colocación de dúas bandas led no chan de ambos os lados do cruzamento que reproducen as indicacións luminosas dos semáforos, abríndolle e pechando o paso aos peóns. "O Concello está a traballar para facer unha cidade máis segura e transitable para todos e todas, con especial atención nas áreas que, por proximidade con centros de ensino, son especialmente sensibles e precisan un maior reforzo", subliñou a concelleira de Seguridade Cidadá e Mobilidade, Montserrat Paz. 

Os dispositivos instalaranse garantindo a ausencia de desniveis e o cumprimento da normativa de accesibilidade. A incorporación destas balizas incrementa, en definitiva, a visibilidade da sinalización semafórica no campo visual inmediato do peón, reducindo o risco de accidentes. O prazo máximo de execución da obra é de oito semanas. 

CEIP Fernández Latorre

Outra mellora significativa da mobilidade e seguridade viaria na contorna dos colexios é a actuación no acceso do CEIP Fernández Latorre, na que o Concello levou a cabo o repintado das zonas de circulación de vehículos para contribuír á ordenación do tráfico, ademais de renovar a sinalización, coa instalación dun sistema de valado para separar a beirarrúa da estada e ampliar o espazo de tránsito peonil para acomodar os viandantes nos momentos de maior tránsito, coincidindo sobre todo cos horarios de entrada e saída do centro. 

Estas accións súmanse aos importantes investimentos do Concello na rede de centros públicos de ensino e as súas zonas lindeiras, co obxectivo de modernizar e mellorar a infraestrutura educativa e a seguridade na cidade.