O Concello completou esta semana os traballos de saneamento previstos no núcleo poboacional de Cances, unha intervención impulsada polo Goberno municipal ao abeiro do Plan de Barrios 2025-27 e que, neste caso específico, supuxo un investimento de 100.000 euros.

A alcaldesa, Inés Rey, informou hoxe de que as obras xa executadas permitiron ampliar e modernizar a rede municipal de colectores, mellorando así a recollida de augas coa adaptación das tubaxes, tal e como se está a facer no conxunto da cidade sempre que se acometen actuacións deste tipo.

"Ademais das quendas de mantemento e conservación da rede, ao longo dos últimos meses concretamos melloras de saneamento en barrios como O Castrillón, Elviña, o Barrio das Flores, Agra do Orzán e tamén no núcleo poboacional de Nostián. Agora, ademais dos traballos que fixemos no núcleo de Cances, vimos de iniciar novas tarefas no lugar da Comeanda, esta mesma semana", indicou a rexedora.

Neste sentido, en Cances implantáronse tubaxes de PVC -máis resistentes, por exemplo, que as de gres, que se utilizaban antigamente- e dun maior grosor. Con esta medida, os servizos municipais reforzan a seguridade da rede ante posibles fugas de augas e tamén fronte a xornadas de máis precipitacións.