O Concello habilitará a partir de hoxe a parada definitiva de Bicicoruña nos Cantóns, xunto ao carril bici dos Xardíns de Méndez Núñez. A estación traerá un aumento da capacidade total de vehículos, que pasará de 19 a 27 ancoradoiros. Esta parada substituirá definitivamente á provisional que estivo operativa ata o de agora na beirarrúa de en fronte. 

Este movemento avanza a que moi pronto será a nova configuración dos Cantóns tras o proxecto de remodelación a grande escala impulsado polo Goberno de Inés Rey, que avanza a moi bo ritmo e que suporá unha ampliación xeral das zonas de tránsito peonil, das zonas verdes -na contorna pasarase de 450 metros cadrados de espazos vexetais a máis de 1.200- e dos equipamentos e servizos desta arteria fundamental da cidade. 

Este mesmo verán tamén entraron en servizo as novas paradas de transporte urbano nos Cantóns, fronte ao Obelisco e fronte ao Copacabana, definindo tamén o que serán as opcións de transporte público na zona. 

Un novo impulso para Bicicoruña

O Concello completa unha mellora xeral da infraestrutura das estacións de Bicicoruña, un dos servizos municipais máis exitosos que este año está a bater todos os seus rexistros históricos de uso -no 2026, varias xornadas sobrepasaron por primeira vez os 10.000 usos diarios-. 

Neste marco, a alcaldesa xa anunciou a ampliación dos ancoradoiro de ata seis estacións en diferentes puntos da cidade, co obxectivo de adaptar o servizo ao incremento da demanda e facilitar a dispoñibilidade de bicicletas e prazas de estacionamento. En total, o Concello instalou a semana pasado 16 novos ancoradoiros: catro máis na estación do CHUAC, catro na Torre de Hércules, dous no Campo da Leña, dous no Ágora, dous na contorna do hospital Abente y Lago e outros dous na estación de Agrela 1. Estas actuacións súmanse á ampliación xa anunciada para a praza de Tabacos, onde o Concello pasou dos 12 aos 25 ancoradoiros, máis do dobre da capacidade actual.