O Concello da Coruña abriu o prazo de presentación de solicitudes con vistas ao primeiro trimestre dos cursos de iniciación ao golf que terán lugar no Campo Municipal da Torre durante o vindeiro ano.

A oferta total de cara ao 2024 é de 688 prazas, distribuídas en cinco quendas diferenciadas (de xaneiro a marzo; de abril a xuño; xullo; agosto; e de outubro a decembro). Neste sentido, para a quenda inicial prevista nos tres primeiros meses do ano disporanse 144 prazas, con cursos orientados ao público infantil (6-11 anos), xuvenil (12 a 16 anos) e adulto (de 17 anos en diante).

En canto ao primeiro trimestre de ano, as datas de inicio e finalización dos cursos serán as seguintes:

• Luns e xoves: inicio o 4 de xaneiro e finalización o 14 de marzo de 2024.
• Martes e venres: inicio o 2 de xaneiro e finalización o 15 de marzo de 2024.
• Sábados e domingos: inicio o 7 de xaneiro e finalización o 17 de marzo de 2024.

A presentación de solicitudes, ata o domingo 10

Todas as persoas interesadas en presentar a documentación necesaria para optar ás 144 prazas que se ofertan no primeiro trimestre de 2024 xa poden formalizar a súa solicitude. O prazo estará aberto ata o vindeiro domingo 10 de decembro, ás 23.59 horas.

Cómpre lembrar, a este respecto, que terán preferencia as persoas empadroadas no Concello da Coruña e que non participasen xa en convocatorias previas dos cursos municipais de iniciación ao golf.

A dita preinscrición deberá realizarse en liña, a través do formulario xa habilitado na páxina web da Concellaría de Deportes.

Toda a información sobre os cursos municipais de iniciación ao golf poden consultarse na web dos  Cursos de Golf 1.º trimestre 2024 .

A distribución de prazas prevista de cara ao 2024

Xa está definido o cadro de distribución de prazas de cara ás cinco quendas dos cursos municipais de iniciación ao golf en 2024. É o seguinte:

• Xaneiro-febreiro-marzo: 144 prazas.
• Abril-maio-xuño: 144 prazas.
• Xullo: 128 prazas.
• Agosto: 128 prazas.
• Outubro-novembro-decembro: 144 prazas.