Este xoves, 28 de marzo, terá lugar no Fórum Metropolitano a clausura do programa municipal Inicia, que trata de fomentar entre os e as estudantes da cidade a cultura emprendedora e que se leva a cabo ao longo de todo o curso en centros da cidade que imparten ciclos formativos ou de Secundaria. No marco deste programa, o estudantado leva a cabo distintos proxectos de emprendemento que se presentan á tradicional Feira de Ideas. As mellores propostas estarán expostas durante toda a xornada de mañá no hall do Fórum, se ben ás 18.00 horas está previsto que comece o acto de entrega de premios dos proxectos gañadores, un evento que estará presidido polo alcalde da Coruña, Xulio Ferreiro, e o concelleiro de Emprego, Alberto Lema. Os proxectos premiados poden beneficiarse de 6 meses gratis de 'incubación' nas instalacións do viveiro municipal de empresas do Papagaio.

"Os resultados do programa INICIA son sempre especialmente remarcables, xa que os e as mozas da cidade experimentan, de primeira man, o que é a creación dun proxecto emprendedor", salientou o concelleiro de Emprego, que agradeceu a participación dos centros educativos da cidade, que nesta edición foron o IES Calvo Sotelo, o CIFP de Imaxe e Son, CPR López y Vicuña, EASD Pablo Picasso, IES Sardiñeira, CIFP Someso e o CPR Afundación.

Ademais, e dentro das actividades programadas para esta xornada de clausura, o auditorio do Fórum acollerá, entre as 16.30 e as 18.00 horas, o evento Difusión da Cultura Emprendedora, na que varias mozas contarán as súas experiencias no mundo do emprendemento. É o caso de Carmela López, profesora do CIFP Someso, Cristina Velasco, de Anaquiños de Papel, David Sueiro, de Galo Celta e Ana Barros e Esther Insua, de IdentiK3D, empresa creada a partir do proxecto gañador da edición de 2017 de Inicia.