A mostra 'Auga e soño', de Antón Patiño, porá fin á súa estadía na sala de exposicións municipal de Palexco a fin de semana do 11 e 12 de abril con dúas actividades de clausura para todos os públicos. Trátase de dous obradoiros familiares e unha visita guiada co autor. "Esta iniciativa busca achegar á cidadanía a obra de Antón Patiño, un dos artistas contemporáneos galegos máis relevantes, e cuxo traballo desde o Goberno de Inés Rey quixemos traer á cidade", indicou Gonzalo Castro, concelleiro de Cultura e Turismo.

Nos obradoiros para familias 'Garabatos estratigráficos', proporanse unha serie de xogos creativos que partirán dos conceptos e formas desenvolvidas polo artista. Explorarase así un concepto expandido do debuxo que levará ás persoas participantes a experimentar con pigmentos, olores, formas, ritmos e cores para acadar unha peza artística única e persoal que levarán de recordo. Os obradoiros están dirixidos a nenos e nenas a partir de 5 anos, que deberán estar acompañados por unha persoa adulta. Serán o sábado 11 e domingo 12 de abril ás 12.00 horas e terán unha duración de 60 minutos. Xa é posible reservar praza escribindo ao correo electrónico ludidactica@gmail.com.

Por outra banda, o sábado 11 ás 18.00 horas levarase a cabo unha visita comentada que ofrece unha introdución accesible ás ideas principais da exposición. Explicarase como Antón Patiño crea o seu propio vocabulario visual -baseado en signos e símbolos recorrentes-, como emprega a pintura como materia en movemento, e como concibe o cadro como un espazo frontal, aberto e cargado de significado. Un percorrido que axuda a comprender de maneira sinxela a forza expresiva, simbólica e conceptual da súa obra recente. A entrada será libre, por orde de chegada ata completar a capacidade da sala.

'Auga e soño' é unha exposición individual de Antón Patiño composta por trinta obras de gran formato realizadas polo artista nos dous últimos anos, estruturadas en secuencias cromáticas e narrativas que propoñen un contorno visual envolvente. A disposición dos lenzos no espazo, combinada con intervencións directas sobre o chan e dúas pezas audiovisuais, constrúe unha experiencia perceptiva intensa e inmersiva, característica do universo simbólico do artista. A mostra formula un diálogo entre as obras e o espazo expositivo, invitando á reflexión sobre a materia pictórica, os signos-raíz, a memoria e a construción de territorios emocionais.

Antón Patiño é un pintor que encontra, expresa e constrúe o seu propio vocabulario para comunicarnos a súa maneira de ver o mundo. Para el, a pintura ten unha relación moi directa coa natureza; preto da terra, en contacto coa materia, coas mans manchadas con pigmentos naturais e coas texturas da paisaxe.