O programa de carreiras populares do Concello da Coruña incorpora un novo patrocinador, a empresa Vegalsa-Eroski, referente no sector da distribución alimentaria en Galicia.

O convenio coa firma galega inclúe, entre outros aspectos, a súa colaboración no avituallamento das persoas participantes no Maratón Atlántica Coruña42 que organiza o concello o próximo 2 de outubro.

O Goberno municipal promove hábitos de vida saudables e ese obxectivo implica, entre outros factores, a práctica da actividade física e unha alimentación que vaia na mesma liña.

Dentro da súa estratexia de responsabilidade social empresarial, Vegalsa-Eroski implícase en iniciativas que promoven unha alimentación e hábitos de vida saudables entre as persoas, con independencia da idade que teñan.

Ademais, promove a Dieta Atlántica como modelo de alimentación saudable e aliada da lonxevidade poñendo en valor, especialmente, alimentos de tempada e locais.