A concelleira responsable da Área de Benestar Social, Yoya Neira, participou esta mañá na posta en marcha do punto violeta que instalou o centro comercial Marineda City. A edil estivo acompañada de Arnaud Leroy, director Asset Management de Merlin Properties para Marineda City, así como por persoal técnico da Concellaría e outros responsables do centro comercial.

O novo punto violeta de Marineda City é produto do traballo conxunto entre as profesionais do Centro de Información ás Mulleres (CIM), integrado na Área de Benestar Social, e os responsables do centro comercial. A concelleira Neira destacou que esta "colaboración fluída entre o Goberno de Inés Rey e a empresa privada é a mellor arma de concienciación e loita contra a violencia machista e un exemplo a seguir". A apertura do punto violeta é a culminación dun traballo que comezou en 2022 coa localización no centro comercial do autobús itinerante da campaña do 25N e continuou cos obradoiros de sensibilización que o CIM impartiu no centro en 2023.

Durante varios meses, profesionais do Centro de Información ás Mulleres (CIM) proporcionou materiais e orientación a Marineda City para elaborar o seu propio protocolo contra a violencia machista adaptado ás necesidades do centro comercial. Ademais, as profesionais do CIM impartiron formación específica a todo o persoal de xerencia, atención ao cliente, seguridade e limpeza do centro para que saiban como identificar estes casos e actuar en consecuencia. Este asesoramento manterase no tempo sempre que sexa necesario.

O punto violeta de Marineda City sitúase nos dous puntos de atención ao cliente, na planta baixa do centro, e estará aberto durante o horario habitual do centro comercial. Ademais, os clientes de Marineda City atoparán códigos QR con información e recursos noutros lugares, como os aseos e as salas de lactación. O centro conta tamén cun espazo seguro cunha saída directa ao exterior no caso de que sexa necesario para a vítima, evitando así ter que atravesar o centro comercial.

O persoal do punto violeta de Marineda ten entre as súas funcións proporcionar información sobre recursos e servizos especializados, intervir de forma inmediata no caso de que se presencie no centro unha agresión seguindo o protocolo de actuación establecido, acompañar emocionalmente as vítimas, así como derivalas de forma eficaz en función de cada caso, xa sexa chamando á Policía ou aos servizos sanitarios, ou derivando ao CIM, ao xulgado ou ás dependencias policiais para interpoñer unha denuncia.