A concelleira de Medio Ambiente, María García, reuniuse esta mañá coa directora xeral de Conservación da Natureza da Xunta, Ana María Díaz, para solicitar a colaboración da Administración autonómica no programa que desenvolve o Concello da Coruña para a mellora da natureza urbana. A responsable municipal conseguiu o compromiso da Consellería de Medio Ambiente de colaborar neste sentido e incluír a cidade no seu plan de retirada de plantas invasoras, que consiste na eliminación deste tipo de especies, asi como de maleza, en zonas protexidas ou de especial valor.

García saudou o compromiso acadado pola Xunta de Galicia e destacou o traballo que está a facer o Goberno local de cara á mellora e conservación da natureza dentro da cidade, obxectivo para o que é preciso que a mesma se presente libre de plantas invasoras. A concelleira comentou, ao fío, que dentro das actuacións que se están levando a cabo neste eido, o seu departamento prepara unha ordenanza que posibilite a Administración local poder actuar en parcelas que non sexan de titularidade municipal pero que precisen de intervencións neste sentido. “Ademais disto, tamén estamos a traballar para que os próximos contratos que se poidan sacar a licitación dende a nosa área relacionados con zonas verdes inclúan o deber das adxudicatarias de eliminar as prantas invadoras na zona de actuación en cuestión”, comentou.