O concelleiro de Deportes, Manuel Vázquez, recibiu en María Pita aos oito equipos que participan esta fin de semana no Campionato de España Junior de Hóckey a Patíns, competición na que exercerá de anfitrión o Compañía de María, que organiza o evento coa colaboración do Concello. "Para o Goberno de Inés Rey é moi importante seguir a ser un referente na organización de competicións deportivas de todos os niveis e por iso estamos moi satisfeitos por acoller esta na nosa cidade", indicou Vázquez.

Nesta competición participan os mellores equipos do país en categoría Junior, é dicir, nados nos anos 2006 e 2007. A competición arrinca este venres no pavillón municipal de Monte Alto desde as 9.00 horas e prolongarase durante todo o día. O Compañía de María disputará os seus encontros ás 12.00 fronte ao Rochapea e ás 20.30 horas fronte ao Barcelona. O sábado, en horario de mañá, a fase regular culminará co Compañía de María-Las Rozas, ás 12.00 horas. As eliminatorias finais prolongaranse ata o domingo ás 13.30 horas, cando terá lugar a entrega de trofeos do torneo.

No acto de recepción celebrado en María Pita estiveron presentes representantes dos oito equipos participantes: Compañía de María, Ordes, Barcelona, Burgos, MDL, Igualada, Las Rozas, Rivas e Rochapea. Tamén estivo o vicepresidente da Real Federación Española de Patinaxe, Ignacio González Pereira, a presidenta da Federación Galega de Patinaxe, María Jesús Vázquez, e o presidente do Compañía de María, José Luis Otero.