O concelleiro de Cultura e Turismo, Gonzalo Castro, e o presidente da Fundación Rogelio Groba e director artístico do ciclo, Rogelio Groba Otero, presentaron hoxe a quinta edición de Noites na Cidade Vella, unha proposta que volverá combinar música clásica, patrimonio e divulgación cultural a través dun programa de concertos gratuítos en algúns dos espazos máis emblemáticos da cidade. A programación celebrarase entre os días 16 de setembro e 17 de outubro e incluirá un total de nove concertos protagonizados por intérpretes e formacións de prestixio internacional, xunto á participación da Orquestra de Cámara Galega, formación residente do ciclo, e do Ensemble da Fundación Groba.

Durante a presentación, Gonzalo Castro destacou a consolidación dun proxecto que une cultura e patrimonio. "Desde o Goberno de Inés Rey seguimos apostando por iniciativas que permitan achegar a música clásica á cidadanía e poñer en valor espazos singulares da cidade. Noites na Cidade Vella demostrou nestes anos que é posible combinar excelencia artística, divulgación cultural e promoción do noso patrimonio histórico", sinalou.

O ciclo reunirá artistas como o Helix Trío, os recoñecidos músicos Mikhail Pochekin e Michail Lifits, o prestixioso Amatis Trío, o violinista Hrachya Avanesyan, o pianista Jean-Baptiste Doulcet e o pianista galego Miguel Iglesias, ademais das actuacións da Orquestra de Cámara Galega e do Ensemble da Fundación Groba.

Un dos sinais de identidade da iniciativa continúa sendo a utilización de espazos patrimoniais e culturais de referencia da Coruña. Os concertos desenvolveranse no Teatro Rosalía de Castro, a Igrexa de Santiago, a Igrexa de Santa Lucía, o Auditorio da sede de Afundación, o Teatro Colón, a Fundación Luís Seoane e a Igrexa dos Dominicos, configurando un itinerario que convida a descubrir a cidade a través da música.

"Este ciclo permite ofrecer experiencias culturais únicas ao tempo que dinamiza algúns dos espazos máis destacados da Cidade Vella e da contorna histórica da Coruña. É unha proposta que enriquece a programación cultural da cidade e que reforza a nosa condición de referente musical en Galicia", indicou Castro.

Todos os concertos serán de acceso gratuíto ata completar a capacidade dos espazos.

Programación de Noites na Cidade Vella 2026

• 16 de setembro | Teatro Rosalía de Castro: Helix Trío.
• 19 de setembro | Igrexa de Santiago: The Rest Project.
• 22 de setembro | Auditorio Afundación: Mikhail Pochekin e Michail Lifits.
• 26 de setembro | Igrexa de Santa Lucía: Orquestra de Cámara Galega, dirixida por Rogelio Groba Otero.
• 30 de setembro | Teatro Colón: Amatis Trío.
• 3 de outubro | Fundación Luís Seoane: Ensemble da Fundación Groba.
• 9 de outubro | Auditorio Afundación: recital de piano de Miguel Iglesias.
• 14 de outubro | Auditorio Afundación: Hrachya Avanesyan e Jean-Baptiste Doulcet.
• 17 de outubro | Igrexa dos Dominicos: Orquestra de Cámara Galega, dirixida por Rogelio Groba Otero.