O Concello da Coruña e a Asociación de Sarcomas Grupo Asistencial (ASARGA) conmemoraron este luns o Día Internacional do Sarcoma coa instalación dun novo banco amarelo no paseo de San Andrés, xunto á Igrexa Castrense. A alcaldesa, Inés Rey, presentou a acción promovida entre o Concello e a entidade no acto de lectura do manifesto, xunto coa presidenta de ASARGA, María Teresa Deus Trasobares.

Durante a súa intervención, a alcaldesa destacou a importancia de dar visibilidade ás enfermidades pouco frecuentes e ao labor das entidades que acompañan ás persoas afectadas. "As enfermidades pouco frecuentes non poden ser enfermidades invisibles. Porque cando falta visibilidade tamén poden faltar diagnóstico, recursos, investigación ou apoio. E iso é algo que como sociedade non podemos permitir", afirmou.

Rey lembrou que o novo banco amarelo dá continuidade ao proxecto iniciado hai uns meses coa instalación do banco morado dedicado á fibromialxia e que busca converter este espazo nun símbolo de recoñecemento ao tecido asociativo coruñés. "Hoxe A Coruña incorpora a este paseo un novo símbolo da man de ASARGA: este banco amarelo, a cor que representa a loita contra o sarcoma. Hai uns meses instalabamos un banco morado con motivo do Día da Fibromialxia. Hoxe sumamos unha nova cor, e queremos seguir sumando moitas máis", sinalou.

A alcaldesa puxo en valor tamén o traballo que realizan as entidades sociais da cidade e reafirmou o compromiso municipal con elas. "Desde o Concello da Coruña queremos seguir sendo unha administración próxima, que escoita, que acompaña e que contribúe a dar visibilidade ás causas que o necesitan", indicou.

A presidenta de ASARGA, María Teresa Deus, foi a encargada de dar lectura ao manifesto do Día Internacional do Sarcoma, no que se reivindica unha maior visibilidade para esta enfermidade, o acceso equitativo a unha atención sanitaria especializada, o impulso á investigación e a mellora do diagnóstico precoz e dos tratamentos. Así mesmo, fai un chamamento á colaboración entre administracións, profesionais sanitarios e asociacións para avanzar cara a unha atención máis coordinada e de maior calidade. 

No acto tamén participaron a concelleira de Benestar Social, Participación e Igualdade, Nereida Canosa;a responsable de Atención ao Paciente e Usuario da Área Sanitaria da Coruña e Cee, Lourdes Silvoso Fuentes; persoas socias da entidade, colaboradores e colaboradoras, así como representantes doutras asociacións da cidade, entre eles Javier Álvarez Barbeito, presidente da Asociación Española Contra o Cancro da Coruña, e Mila Oreiro, directora da Asociación Párkinson Galicia-Coruña.

O banco amarelo pasa desde hoxe a formar parte do Paseo das Entidades, unha iniciativa do Goberno de Inés para transformar o espazo público nun lugar de recoñecemento ás asociacións que traballan polo benestar social e que contribúe a visibilizar realidades que, pola súa baixa incidencia ou menor presenza social, adoitan quedar fóra do foco.