A Escola Municipal de Música avanza xa os preparativos de cara ao vindeiro curso 2025-2026. Tras o peche da renovación de matrículas, este luns 19 de maio abrirase o prazo de preinscrición correspondente á oferta de prazas dispoñibles, unha bolsa de case 200. A meirande parte delas, en idade de 4 a 7 anos.

O concelleiro de Cultura e Turismo, Gonzalo Castro, puxo en valor "o traballo a escala interxeracional que se leva a cabo na Escola", inaugurada no ano 1998 e que, con máis dun cuarto de século de percorrido, abre a súa formación musical e artística a partir dos 4 anos e sen límite de idade a partir desa franxa.

A directora da Escola, Elena Umbría, fixo fincapé neste aspecto e lembrou que "o feito de que a rapazada e persoas en idade máis avanzada estean na mesma aula ten un impacto moi positivo para todas e todos porque contaxia valores e ilusión e profunda na filosofía que se segue desde a Escola, que é a de integrar a música en toda a sociedade".

Ao abeiro desta proposta, este último ano, o alumnado da EMM desenvolveu actuacións en residencias de maiores, centros cívicos municipais e tamén con pacientes oncolóxicos, "e deulle deste xeito continuidade a esta perspectiva de que a música sexa unha ferramenta social". Esta liña de traballo manterase no vindeiro curso, tal e como confirmou Umbría.

A preinscrición, aberta do 19 ao 23 de maio

O calendario correspondente á oferta de prazas dispoñibles na EMM de cara ao vindeiro curso arrincará este luns 19 de maio, coa apertura da preinscrición, por vía dixital. O prazo estará vixente ao longo da semana, ata o venres 23.

O 2 de xuño publicarase a listaxe das persoas admitidas e será entón cando comece o prazo para formalizar matrícula, ata o 6 de xuño.

As persoas interesadas en consultaren máis información poden facelo presencialmente nas instalacións da Escola (rúa da Torre, 67) ou ben por teléfono, no 981 226 752.