O alcalde da Coruña, Xulio Ferreiro, reuniuse este venres na Autoridade Portuaria co presidente de Portos do Estado, José Llorca, e o presidente do Porto coruñés, Enrique Losada, nunha xuntanza na que, tal e como avanzou o rexedor coruñés, "sentáronse as bases para acadar unha fórmula que garanta tanto a titularidade como a xestión pública de toda a fachada marítima da Coruña", o que inclúe tanto os terreos da Solana e o hotel Finisterre, como tamén os peiraos de Batería, Calvo Sotelo e San Diego, terreos de titularidade portuaria que serán desafectados "a medio ou longo prazo". Este principio de acordo supón a paralización temporal da poxa prevista para a enaxenación dos terreos da Solana e o Finisterre, os primeiros que o Porto coruñés prevé desafectar. "Vimos de celebrar unha reunión frutífera, que supón un paso adiante, e que agora deberá baixar ao plano técnico", adiantou Ferreiro, que deu conta da próxima reunión que as tres partes manterán, o vindeiro 7 de febreiro, no Pazo de María Pita, para concretar a fórmula que permita garantir a xestión pública global de toda a operación de enaxenación dos terreos portuarios, así como a titularidade pública dos mesmos. O acordo, indicou Ferreiro ao remate do encontro, supón tamén buscar solucións que "contribúan a garantir as necesidades financeiras da Autoridade Portuaria e, polo tanto, o financiamento do Porto Exterior, necesidades coas que o Goberno local sempre se amosou empático".

O alcalde manifestou, nunha comparecencia pública co presidente de Portos del Estado unha vez rematada a xuntanza, que o Concello asume que a fórmula que se ache de cara a garantir o uso cidadán dos terreos da fachada marítima da cidade debe ser compatible coa sostibilidade económica da Autoridade Portuaria.