Os barrios da Sagrada Familia e Pedralonga celebrarán esta fin de semana as súas festas, con propostas musicais, actividades infantís, gastronomía e iniciativas pensadas para públicos de todas as idades. As celebracións contan coa colaboración do Concello da Coruña e forman parte do calendario festivo dos barrios da cidade.

Na Sagrada Familia, as festas comezarán mañá, venres 21, ás 21.30 horas coa lectura do pregón. A continuación celebrarase a primeira gran cita musical da fin de semana coa "Festa Rachada" a cargo da orquestra Alaska.

O sábado 22 a programación continuará durante toda a xornada. O barrio acollerá o mercado de artesanía Brota do Norte - Sagrada Familia e, pola mañá, haberá actividades para as nenas e nenos con PekeSFesta, inchables e festa da escuma. Posteriormente terá lugar a sesión vermú coa actuación de Alma Libre.

Pola noite chegará unha nova verbena, que contará coa música de DJ By Kokee e da orquestra Los Platinos.

As festas da Sagrada Familia rematarán o domingo 23. A partir das 13.00 horas haberá unha pulpeira na pista polideportiva, con prezos populares, nunha xornada que tamén contará coa música das corais polifónicas Aires Novos de Pravío, Canticorum, Sagrada Familia e Follas Novas. O peche da programación correrá a cargo de Maghúa Cantareiros.

Pedralonga celebra o sábado as súas festas no aparcadoiro da Fábrica de Armas

O barrio de Pedralonga concentrará a súa programación festiva o sábado 22 no aparcadoiro da Fábrica de Armas.

As actividades comezarán ás 17.00 horas cun programa infantil gratuíto que se prolongará ata as 20.00 horas e que contará con inchables e merenda. Entre as 19.40 e as 20.00 horas celebrarase tamén unha festa da escuma.

Ás 20.00 horas será a quenda de Gaiteir@s Donaire, coincidindo coa celebración dunha gran churrascada a prezos populares.

A música continuará ás 22.30 horas coa gran verbena amenizada pola orquestra Trébol. Finalmente, ás 00.00 horas, un espectáculo de fogos artificiais porá o broche á xornada festiva en Pedralonga.

O concelleiro de Cultura e Turismo, Gonzalo Castro, destacou a importancia destas celebracións "como espazos de encontro e convivencia que contribúen a dinamizar os barrios e a reforzar os vínculos entre a veciñanza". Neste sentido, Castro salientou "o compromiso do Goberno de Inés Rey co tecido asociativo da cidade e co impulso dunha programación cultural e festiva descentralizada, que achegue propostas de lecer para todas as idades aos distintos barrios da Coruña".

O Concello da Coruña apoia un ano máis a celebración das festas nos barrios, colaborando co tecido asociativo para favorecer unha programación descentralizada e achegar propostas culturais, musicais e de lecer aos distintos puntos da cidade.