Avanzan as obras de remodelación dos Cantóns, que progresivamente van amosando a súa nova imaxe, tamén no referente ás áreas axardinadas, que triplicarán a súa superficie con respecto á configuración previa da zona.

Neste sentido, estes días xa é visible o espazo que ocupará o novo corredor vexetal que conectará a praza de Mina co Cantón Pequeno, segregando a beirarrúa e a calzada. Trátase dun percorrido axardinado de máis de 100 metros que sumará especies arbustivas variadas entre a rúa Arévalo máis alá do carreiro de San Blas.

Con esta actuación, o Concello dá un paso máis no reverdecemento da superficie peonil que se está a ampliar nos Cantóns, fronte aos xardíns de Méndez Núñez, aproveitando esta beira para gañar espazos verdes que non existían ata agora.

Máis concienciación para coidar as áreas verdes urbanas

O coidado e preservación colectiva das áreas verdes vertebra a nova campaña de concienciación cidadá posta en marcha polo Concello, que nas últimas semanas vén habilitando paneis sinalécticos en múltiples espazos axardinados do termo municipal co obxectivo de visibilizar a importancia da natureza na paisaxe urbana. 

Os paneis, de carácter divulgativo, repartíronse por centos de puntos da cidade que contan con superficie verde ou xardineiras elevadas cuxo mantemento e conservación lle corresponde ao Concello. Concretamente, en puntos estratéxicos cunha maior afluencia peonil e con máis presencia de elementos vexetais, en barrios como Catro Camiños, Os Castros, Matogrande, Ensanche e Pescaría. Coa disposición desta cartelería, que inclúe mensaxes de sensibilización, o Executivo local busca tamén a posta en valor das áreas verdes en clave de sostibilidade medioambiental. 

"O reverdecemento das cidades é fundamental para contrarrestar os efectos do cambio climático e moitas urbes do continente europeo están a traballar nesta senda. A Coruña é unha delas e un dos eixes que sustenta a nosa liña de actuación é implicar a cidadanía na preservación de espazos públicos que, ademais de ser sinónimo de saúde e biodiversidade, nos pertencen a todas e a todos. Por iso, o primeiro paso para coidar a riqueza natural que nos arrodea debemos dalo nós", expuxo o concelleiro de Infraestruturas, Jesús Celemín.

Celemín lembrou que, en paralelo, o Goberno de Inés Rey está a ultimar os trámites para botar a andar o proceso participativo do proxecto Coruña Verdea, ideado para naturalizar os espazos públicos dos barrios da cidade. O proxecto, que conta con dous millóns de euros en fondos da Fundación Biodiversidade, comezará en outono coa posta en marcha dos obradoiros creativos coas asociacións de veciños, entidades educativas e medioambientais.

Neste sentido, nos últimos días adxudicouse o contrato correspondente ao servizo de asistencia técnica para o dito proceso participativo de Coruña Verdea, que asumirá Cidadanía, cooperativa galega de traballo asociado.