O concelleiro de Culturas, Deporte e Coñecemento, José Manuel Sande, participou esta mañá na presentación De Estudos Abertos, unha proposta elaborada por un colectivo de artistas locais que se celebrará este venres, día 20 de maio, e na que 14 creadoras e creadores da cidade abrirán os seus estudos á veciñanza. O edil destacou que esta iniciativa de portas abertas, que terá lugar de 17.00 a 23.00 horas, permitirá aos axentes culturais “mostrar unha parte do seu traballo, a produción e proceso artístico, que máis descoñece a cidadanía”. Sande sinalou que o apoio do Goberno local á difusión de proxectos como De Estudos Abertos vén refrendado pola aposta “pola autoxestión e acompañamento desde as institucións os procesos nacidos na comunidade fronte ao paternalismo e dirixismo na execución das políticas culturais”, explicou, unha liña de traballo que a súa área vén de realizar, lembrou, con propostas como Onde vive a música, onde revives ti, das salas de concertos da cidade.

Na tarde do venres 20, 14 estudos abrirán, desde as cinco da tarde, as súas portas á cidadanía e a outras e outros artistas cos que compartirán espazo. En total serán 28 creadoras e creadores de diversas disciplinas, como a pintura, fotografía, escultura ou vídeo, as e os que participarán neste proxecto, que ten como referencia os Open Studio postos en marcha en cidades de todo o mundo. Un dos obxectivos desta xornada de portas abertas aos estudos segundo un dos promotores da actividade, o pintor Jano Muñoz, é trasladar a conversa dos centros de arte, museos e galerías “á cociña” das e dos creadores, coa finalidade de recuperar os estudos “como espazo de encontro e debate sobre arte”.

No grupo que formará a primeira edición da proposta De Estudos Abertos atópanse artistas locais de estilos e traxectorias diferentes, “desde os máis novos, como Laura Pintos ou Raúl Álvarez, aos recoñecidos Manuel Vilariño, Correa Corredoira ou Héctor Francesch”, explicou Muñoz. As e os 14 creadoras e creadores con estudo propio convidarán a outros tantos artistas a compartir o mesmo espazo creativo na tarde do venres, unha ruta que poderá seguirse a través dun mapa editado polo Concello e que está dispoñible para a súa descarga ao final desta nova.