Este venres 1 de decembro comezarán as actividades infantís de Nadal que promove o Concello a través da Oficina Municipal de Información ao Consumidor (OMIC), situada na rúa Costa da Palloza, 8.

Os obradoiros, que se estenderán ata o día 5 de xaneiro, están ideados para nenas e nenos de entre 4 a 10 anos, baixo un formato que busca, en primeira instancia, promover a creatividade da rapazada e, ademais, facilitar a conciliación familiar nestas datas festivas.

Haberá un total de 33 talleres entre os días 1 de decembro e 5 de xaneiro, con sesións específicas por tres treitos de idade (para a cativada de 4-5 anos; para a de 6-7-8 anos; e para a de 9-10 anos). Cada sesión terá unha duración de media hora, e levaranse a cabo de forma consecutiva. As datas e horarios previstos son os seguintes:

• 1 de decembro (de 17.00 a 18.30 h): Obradoiro de fabricación de adornos para a árbore de Nadal.
• 2 de decembro (de 12.00 a 13.30 h): Obradoiro de creación sostible de colgador móbil.
• 8 de decembro (17.00 a 18.30 h): Obradoiro de fabricación de adornos para a árbore de Nadal.
• 9 de decembro (12.00 a 13.30 h): Obradoiro de elaboración dos faroliños de Nadal con materiais reciclados.
• 15 de decembro (17.00 a 18.30 h): Obradoiro de fabricación de xoguetes de Nadal: memory.
• 16 de decembro (12.00 a 13.30 h): Obradoiro de creación sostible de colgador móbil.
• 22 de decembro (17.00 a 18.30 h): Obradoiro de adornos de Nadal con pinzas.
• 23 de decembro (12.00 a 13.30 h): Obradoiro de fabricación de agasallos de Nadal: moedeiros con tetrabricks.
• 29 de decembro (12.00 a 13.30 h): Obradoiro de fabricación de xoguetes de Nadal: memory.
• 30 de decembro (12.00 a 13.30 h): Obradoiro de fabricación de xoguetes de Nadal: tres en raia.
• 5 de xaneiro (12.00 a 13.30 h): Obradoiro de elaboración dos faroliños de Nadal con materiais reciclados.

Todas as actividades serán de balde. A inscrición poderase levar a cabo na propia OMIC, 15 minutos antes do comezo de cada actividade. A este respecto, cómpre lembrar que a capacidade máxima prevista para cada obradoiro será de 9 persoas por sesión.

A Casa dos Xoguetes tamén comeza a súa actividade este venres 1

Tamén este venres 1, o Concello da Coruña, a través da Oficinal Municipal de Información ao Consumidor (OMIC), porá en marcha un ano máis a campaña da Casa dos Xoguetes, unha iniciativa pensada para fomentar o consumo consciente e responsable e darlles unha nova vida a aqueles obxectos en bo estado que non teñen uso. 

A oficina, situada no número 8 da rúa Costa da Palloza, estará aberta ata o 5 de xaneiro e permitiralles a aquelas persoas interesadas entregar xoguetes en bo estado de conservación. Os xoguetes que se recollan terán que cumprir coas normativas europeas para o seu uso e estarán destinados a nenos e nenas de ata 14 anos. Aceptaranse un máximo de 10 xoguetes entregados por usuario ou usuaria.

Esta campaña, impulsada polo Goberno de Inés Rey, ten como finalidade contribuír a fomentar un consumo responsable entre a cidadanía, alongando a vida útil dos obxectos dun xeito solidario e desinteresado, que axuda tamén a reducir o volume de residuos xerados na cidade.

Os horarios de apertura da Casa dos Xoguetes serán os seguintes: de luns a venres das 10.00 ás 19.00 horas, e os sábados das 10.00 ás 14.00 horas.