Hoxe ás 16.00 horas abre na web www.coruna.gal/nocturnia o prazo de inscrición para a primeira quenda de actividades da edición primavera/verán de Nocturnia, o programa de ocio saudable para mozos e mozas de 12 a 30 anos organizado polo Concello da Coruña

As actividades comezarán o venres día 5 e o sábado 6 cunha oferta de maquillaxe teatral, unha ruta dramatizada polo Castelo de San Antón varios obradoiros artísticos. Hai programadas actividades ata a última fin de semana de xuño e a mecánica será sempre a mesma: as inscricións ábrense os luns ás 16.00 horas e péchanse os xoves ás 12.00 horas, ou ata esgotar as prazas.

Na edición de primavera/verán 2024 o Goberno de Inés Rey inclúe opcións para todos os gustos e inquedanzas: deportivas, paseos en barco, defensa persoal, rutas culturais teatralizadas pola nosa cidade, saídas dun día para descubrir espazos naturais de Galicia ata un amplo abano de actividades relacionadas coas artes escénicas, plásticas, musicais, dixitais ou literarias. As actividades realizaranse en espazos e horarios diversos onde poder compartir experiencias e facer novas amizades.

Todas as actividades e obradoiros son de balde. Na web municipal www.coruna.gal/nocturnia as persoas interesadas atoparán todas as propostas desa fin de semana nas que poderán apuntarse. Este programa está co-financiado polo Plan Nacional de Prevención sobre Drogas do Ministerio de Sanidade.