A alcaldesa, Inés Rey, foi a encargada de dar o pregón no inicio das festas populares dos Mallos, que se celebran ata este domingo 29 en diferentes localizacións do barrio coruñés. A rexedora incidiu na importancia de manter vivas estas celebracións, que "fortalecen a pertenza e a identidade de barrio".

"Desde o Concello estamos a fomentar as festas nos distintos distritos, ofrecendo ás asociacións unha maior autonomía para confeccionar os seus programas", indicou Rey, que desexou aos veciños e veciñas unhas felices festas. Nos Mallos as celebracións comezaron na rúa Ángel Senra co pregón e cunha sesión musical de DJ Pukas, estará presentado por Dani Rodríguez. Tamén houbo unha homenaxe aos fundadores do Club Feminino Karbo e a xornada rematará coa actuación da Orquestra Saudade. 

O sábado a xornada comezará con pasarrúas a cargo da agrupación Aturuxo na rúa Antonio Viñes, onde tamén haberá unha sesión desde as 13.00 horas a cargo de Mar Davila. Na rúa Diego Delicado haberá concerto desde as 13.00 horas de The Homeless e DJ Pukas. Tamén haberá churrascada a cargo da peña Tralla Brava. Pola tarde, ás 17.00, en Ángel Senra haberá festa da escuma e actuación de DJ Javito e taller de maxia de Charly Brown. Desde as 21.00, verbena coa orquestra Brigantium.

O domingo haberá pasarrúas a cargo dos Kilomberos de Monte Alto e, na rúa Diego Delicado, actuación de Mar Davila desde as 13.00 horas.