A alcaldesa da Coruña, Inés Rey, asistiu hoxe ao ensaio de 'Jenůfa', a produción que abrirá a 74ª Tempada Lírica de Amigos de la Ópera, unha das citas culturais máis destacadas do calendario coruñés. A obra, composta por Leoš Janáček, poderá verse os días 17 e 19 de setembro no Palacio da Ópera.

Durante a visita ao Fogar de Santa Margarida, onde se están a producir os ensaios, a alcaldesa puido coñecer de primeira man os preparativos dunha produción que contará cun papel destacado da Orquestra Sinfónica de Galicia e do Coro Gaos, dous dos referentes musicais da cidade que participarán nesta apertura da tempada.

Inés Rey destacou a importancia da Tempada Lírica para a vida cultural da Coruña e o traballo desenvolvido por Amigos de la Ópera ao longo das súas máis de sete décadas de historia. "Falamos dunha institución fundamental para a nosa cidade, que converte A Coruña nun referente da lírica dentro e fóra de Galicia e que segue ofrecendo cada ano propostas artísticas da máxima calidade", sinalou a rexedora.

O Concello da Coruña mantén o seu apoio á programación de Amigos de la Ópera, que nesta edición incluirá tamén a representación de 'Tosca', de Giacomo Puccini, así como un ciclo de lírica inclusiva e diversas actividades orientadas ao público infantil. A apertura da tempada con 'Jenůfa' supón o inicio dun novo curso lírico no que a cidade volverá reunir artistas, formacións e producións de primeiro nivel, consolidando o seu papel como unha das grandes capitais da música clásica e operística do noroeste peninsular.

Sobre 'Jenůfa'

A produción de 'Jenůfa', ópera de Leoš Janáček, poderá verse no Palacio da Ópera os días 17 e 19 de setembro, sendo a primeira vez que este título se representa en Galicia. A obra abrirá a 74ª Tempada Lírica de Amigos de la Ópera e converterá A Coruña na cuarta cidade española en acoller esta composición estreada orixinalmente en Brno en 1904. 

A montaxe, dirixida escenicamente por Emiliano Suárez, traslada a acción á América profunda dos anos cincuenta, recreando un universo visual marcado por elementos icónicos da época, como unha gasolineira e a estética da sociedade norteamericana de posguerra. A historia aborda cuestións como os prexuízos, os conflitos familiares, a violencia, a culpa e o perdón a través das personaxes de Jenůfa, Kostelnička, Laca e Števa.

A produción contará cunha escenografía de Alfons Flores, vestiario de Ana Garay e iluminación de Luis Perdiguero, ademais da participación da Orquestra Sinfónica de Galicia, do Coro Gaos e dun amplo elenco artístico e técnico que reúne preto de 200 profesionais.

A programación arredor de 'Jenůfa' inclúe tamén actividades paralelas como a reedición do cómic inspirado na ópera, realizada en colaboración con Viñetas desde o Atlántico, e unha conferencia divulgativa a cargo de Julián Jesús Pérez o día 16 de setembro en Afundación.