O venres 3 de maio, desde o pavillón de Riazor até o pé da Torre de Hércules, case 30 centros de ensino da Coruña, Arteixo, A Laracha, Arteixo, Cambre, Carballo, Carral, Cerceda, Coristanco, Laxe, Ponteceso, Sada, Vimianzo e Zas percorreron a nosa cidade nunha carreira non competitiva baixo o lema "O galego é a fórmula" para reinvindicaren o dereito a medrar en galego.

O Correlingua, ademais da andaina e a festa final na Torre que este ano contou con Cê Orquestra Pantasma e Monoulious DOP, é unha proposta lúdico-educativa que se desenvolve nos centros educativos ao longo de todo o curso que este ano chega á súa décimo oitava edición. O profesorado e o alumnado participaron, ademais, coa elaboración de materiais nos tres concursos que se organizaron: elaboración do manifesto, banda deseñada e vídeo, que gañaron respectivamente os centros IES de Carral, o CPI Cabo da Area de Laxe e o CEIP Albeiros de Lugo.

Aínda que todos os centros participantes demostraron toda a implicación e o esforzo realizado ao longo do ano escolar nos seus carteis, deseño de vestiario e lemas durante o percorrido, foron o CPI O Cruce, de Cerceda, o IES Agra de Leborís, da Laracha, e o CEIP Graxal de Cambre os que levaron o primeiro, segundo e terceiro premio, respectivamente, á mellor animación durante a xornada.

A Asociación Cultural Correlingua é a entidade organizadora deste gran proxecto de normalización lingüística destinada á infancia e á mocidade no ámbito educativo, con quen colabora o Servizo de Normalización Lingüística do Concello da Coruña, ademais doutros moitos concellos galegos, xunto coa axuda loxística da Asociación Socio-Pedagóxica Galega, A Mesa pola Normalización Lingüística e CIG-Ensino.