O barrio de Monte Alto acolleu este domingo a terceira edición do Roteiro da Memoria Cívica, unha iniciativa integrada na programación das festas do barrio e destinada a reivindicar a memoria democrática e a historia das persoas que sufriron a represión franquista na cidade. O percorrido estivo conducido por Carlos Ares e contou coa participación do concelleiro de Cultura e Turismo, Gonzalo Castro, do historiador Rubém Centeno e de integrantes do colectivo de expresas e expresos políticos da Coruña. 

O roteiro comezou diante do Monumento aos Irmáns da Lexía e continuou posteriormente cara á contorna do antigo cárcere provincial de Monte Alto. Ao longo da mañá, as persoas participantes puideron coñecer diferentes episodios da historia da represión franquista na cidade e o papel desempeñado por numerosas persoas que defenderon a legalidade democrática e sufriron prisión, persecución, exilio ou morte. Durante a súa intervención, Gonzalo Castro puxo en valor a importancia deste tipo de iniciativas. "A memoria democrática non é nostalxia nin unha mirada ao pasado; é asumir a nosa historia con verdade para construír un presente máis xusto e un futuro máis libre e democrático", sinalou o concelleiro. 

Castro lembrou tamén o compromiso do Goberno de Inés Rey coa recuperación da memoria democrática e coa reparación das vítimas da ditadura. "As institucións democráticas non poden limitarse a acompañar as homenaxes. Temos a responsabilidade de investigar, recoñecer, reparar e transmitir. Debemos incorporar a memoria ás políticas públicas e garantir que as vítimas ocupen o lugar que lles corresponde no relato da cidade", afirmou. O edil repasou algunhas das actuacións impulsadas polo Concello nesta materia, entre elas o estudo promovido polo Instituto José Cornide que permitiu identificar máis de 140 traballadoras e traballadores municipais represaliados, os homenaxes a figuras como Joaquín Martín Martínez e Alfredo Suárez Ferrín, así como os traballos para a declaración de diversos espazos da cidade como Lugares de Memoria Democrática. 

O concelleiro destacou tamén o papel da Casa Museo Casares Quiroga como eixo das políticas municipais de memoria. "Queremos que sexa a casa común da memoria democrática coruñesa, un espazo aberto ás asociacións memorialistas, á investigación, á divulgación e á participación cidadá", explicou. 

O roteiro concluíu cunha chamada a continuar fortalecendo as políticas de memoria democrática desde o rigor histórico e institucional. "Queremos construír unha política de memoria sólida, compartida e permanente, que permaneza no espazo público e na conciencia da cidade. Un traballo feito con paso lento e mirada longa para que ninguén poida revertelo no futuro", concluíu Gonzalo Castro.