O Centro Sociocultural Ágora acollerá o sábado 7 de outubro o 'Mobile Culture', unha xornada interactiva sobre arte, cultura e novas tecnoloxías dirixida ás e aos profesionais do tecido cultural da cidade e, en xeral, á cidadanía interesada no programa do evento, orientado á innovación dixital en termos culturais e artísticos.

O 'Mobile Culture', unha iniciativa formativa cofinanciada a través do programa europeo Erasmus+, terá lugar na Aula 9 do Ágora en horario de mañá, entre as 10.00 e as 14.00 horas. Durante a xornada, as persoas asistentes terán a oportunidade de asistir a obradoiros formativos sobre IA aplicada á promoción cultural, aplicacións dixitais de promoción cultural e outro sobre creatividade e innovación.

Cada persoa poderá inscribirse nun dos tres obradoiros previstos, formalizando a súa solicitude a través da páxina web das Bibliotecas Municipais. A pasarela en liña para reservar praza nos talleres habilitarase a partir das 10.00 horas do sábado 30 de setembro, e o prazo pecharase ás 10.00 horas do venres 6 de outubro. 

O cronograma do programa da xornada é o seguinte:

• 10.00: Benvida.
• 10.15: Masterclass Erasmus+.
• 10.30: Boas prácticas dos proxectos europeos.
• 11.00: Presentación do proxecto Cultura Móbil.
• 11.30: Pausa para café e networking.
• 12.00: Obradoiros de Cultura Móbil.

O evento 'Mobile Culture', que tamén se formula como unha oportunidade para interconectar a traballadoras e traballadores pertencentes ao tecido cultural local, reforza o abano de propostas formativas que está a impulsar o Goberno de Inés Rey en materia cultural e tecnolóxica, creando sinerxías de interese con perspectivas de futuro.