O alcalde da Coruña, Xulio Ferreiro, participou hoxe na recepción celebrada no pazo municipal de Barcelona con representantes doutros concellos que esta tarde acompañan á alcaldesa desta cidade, Ada Colau, na manifestación convocada tras os ataques perpetrados a semana pasada nas Ramblas e Cambrils (Tarragona) en contra dos atentados e de calquera forma de violencia e a favor da paz. "Este é un momento de estar aquí apoiando, porque a dor desta cidade estes días é a dor de todos e de todas. Creo que o que necesita Barcelona é que esteamos apoiando sen fisuras unha cidade que vén de sufrir un revés do que non é doado recuperarse, pero que, ao mesmo tempo, quere seguir sendo esa cidade dinámica, acolledora, diversa, esa cidade sen medo que foi e que quere continuar sendo", manifestou o rexedor antes dos actos institucionais, no curso dos cales tamén asinou, como o resto de representantes, no Libro de Condolencias. Tal e como recordou Ferreiro, a propia tarde do atentado de Barcelona, púxose en contacto coa alcaldesa, "para poñernos a súa disposición para o que necesitase de nós, tanto da cidade e de min mesmo, como alcalde da Coruña".

O alcalde formará parte do bloque institucional municipal que participará na manifestación, convocada baixo o lema 'No tinc por' (Non teño medo), que atravesará a cidade a partir das seis da tarde desde a Diagonal ata a Plaça de Catalunya, e que estará encabezada pola cidadanía. Neste sentido, Ferreiro considerou este sábado que os e as representantes públicas ocuparán no acto "o lugar que nos corresponde neste momento, que é estar detrás da cidadanía e ceder o protagonismo ás xentes de Barcelona e a todas as persoas que veñan desde outras partes de Cataluña e de todo o Estado para apoiar a cidade de Barcelona".